Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 247 Hüküm no: 317 Orijinal metin no: [180-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mıgırdiç v. Asvali’nin Kenare bt. Derviş ile ortak olduğu bahçedeki hissesini Ali b. Abdullah’a sattığı Havâss-ı aliyye kazâsına tâbi‘ Hasköy mahallâtından Abdüsselam mahallesinde sâkin Mıgırdiç v. Asvali nâm Ermeni meclis-i şer‘-i hatîr-i lâzımü’t-tevkīrde işbu bâ‘isü’l-kitâb Ali b. Abdullah nâm kimesne mahzarında bi’t-tav‘i’s-sâf ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafı Lağımcı Hüseyin mülkü ve bir tarafı ba‘zan Musa Efendi ve ba‘zan Ali Ağa mülkü ve bir tarafı mer‘â ve bir tarafı tarîk-i âm ile mahdûd ve mümtâz eşcâr-ı müsmire ve gayr-ı müsmireyi müştemil olup Kenare bt. Derviş nâm zimmîyye ile ale’l-iştirâki’s-seviy mutasarrıf olduğumuz hadîkadan nısf hisse-i şâyi‘amı mezbûr Ali’ye nakd-i râyic fi’l-vakt on dokuz bin beş yüz akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i nısf-ı mebî‘ eyledim, ol dahi vech-i mübeyyen üzre iştirâ ve tesellüm eyledi, ba‘de’l-yevm hadîka-i mezbûrenin nısfı merkūm Ali’nin mülk-i müşterâsıdır, keyfemâ yeşâ ve yehtâr mutasarrıf olsun dedikde, mukırr-ı merkūmun ikrâr-ı meşrûhunu el-mukarru lehü’l-mezbûr Ali bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâlis ve’l-ışrîn min Cumâdelûlâ li sene tis‘în ve erba‘în [ve elf]. Şuhûdü’l-hâl: Süleyman Efendi b. Mirza el-İmâm, Muzaffer Çavuş b. Abdullah, Ali Beşe b. Mustafa el-muhzır, Mehmed Beşe b. Abdullah, Mustafa b. Mehmed, Yusuf Bey b. Abdullah, Hüseyin Çelebi b. Ali, Hüseyin b. Yusuf, Ahmed Bey Habbâz