Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 88 Hüküm no: 39 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mekke kadısı Mehmed’in varislerinden Abdurrahman Efendi’nin diğer varis Hatice Hanım’ın zimmetini ibra etmesi Vürûd-ı Nakil Mahmiye-i İstanbul’da Muhtesib Karagöz mahallesi ahâlîsinden olup bundan akdem Mekke-i mükerreme kādısı iken vedâ‘-ı âlem-i fânî eden merhûm Şeyh Mehmed Efendi b. Hüsameddin Efendi’nin verâseti zevce-i metrûkesi umdetü’l-muhadderât zübdetü’l-muvakkarât Hadîce Hatun ve li-ebeveyn kız karındaşı Ümmühani Hatun ile li-ebeveyn ammi Abdurrahman Efendi’ye münhasıra olduğu şer‘an sâbit oldukdan sonra mezbûre Ümmühani tarafından husûs-ı âti’l-beyâna vekîl olduğu zâtı ma‘rifet-i şer‘iyye ile ârifân umdetü’l-mehâdîmü’l-kirâm Ataullah Efendi necli’l-mevâli’l-merhûm Çivizâde Efendi ve el-Hâc İbrahim Efendi b. Mehmed şehâdetleri ile ve mezbûr Abdurrahman Efendi tarafından husûs-ı âti’l-beyâna vekîl olduğu hâlâ medîne-i Kastamonu’da nâibü’ş-şer‘ olan diğer Abdurrahman Efendi b. el-Fettâh b. el-İlyas kıbelinden vârid olan nakl-i şer‘înin zeylinde isimleri mastûr olup yol şâhidleri olan Ahmed Efendi b. Osman ve Mehmed Beşe b. Veli nâm kimesneler şehâdetleri ile sâbit olup mezbûr Abdurrahman Efendi’nin sulbî oğlu olan Hasan Efendi meclis-i şer‘-i şerîfde bâ‘isetü hâze’l-kitâb mûmâ-ileyhâ Hadîce Hatun tarafından husûs-ı âti’l-beyâna vekîl olup vekâleti zâtını ma‘rifet-i şer‘iyye ile ârifân Abdullah Efendi b. Abid ve diğer İbrahim Efendi b. ( ) nâm kimesneler şehâdetleri ile şer‘an sâbite olan umdetü’l-emâsil ve’l-akrân Hüseyin Ağa b. Hasan Efendi mahzarında bi’l-vekâle ikrâr ve takrîr-i kelâm edip merhûm-ı mûmâ-ileyhin terekesinden olup mahalle-i mezbûrede hâriciye ta‘bîr olan ma‘lûmü’l-hudûd ve’l-müştemilât menzil ve mahrûse-i Galata’ya tâbi‘ Rumilihisarı demekle ma‘rûf kasabada vâki‘ yalı ta‘bîr olunur ma‘lûmü’l-hudûd ve’l-müştemilât menzil bey‘ olunup semenlerinden merhûm-ı mezbûrun müvekkil-i mûmâ-ileyhâya mehir deyni olan yedi yüz elli guruş ve el-Hâc İbrahim Efendi b. Mehmed’e deyn olan bin beş yüz guruş ve Nâyî Mehmed Efendi’ye deyn olan dört yüz guruş ve Kurd Ali nâm kimesneye deyn olan üç yüz elli guruş edâ olunup merhûm-ı mûmâ-ileyhin bâkī terekesi deynden mütehallis oldukdan merhûm-ı mûmâ-ileyhin terekesinden müvekkile-i mûmâ-ileyhâ yedinde olup mecmû‘u beş yüz guruşa muhammen esâs-ı beyt ve evânî-i nühâsiye ve gayr-ı nühâsiye ve kütüb ve kalîl ü kesîr, celîl ü hakīr cemî‘ eşyâdan dört sehmden müvekkillerimin hissesi olan üç sehmi mukābelesinde şerâit-i sıhhat-i sulhü hâvî ve mevâni‘den ârî bi-tarîkı’t-tehârüci’ş-şer‘î vekîl-i mûmâ-ileyh Hüseyin Ağa ile üç yüz yetmiş beş esedî guruşa sulh olup bedel-i sulh-ı mezbûru vekîl-i mûmâ-ileyh yedinden tamâmen ahz u kabz etdiğimden sonra merhûm-ı mûmâ-ileyhin tere[ke]sine müte‘allıka âmme-i hukūk-ı ma‘lûme ve mechûle da‘vâsından müvekkile-i mûmâ-ileyhâ Hadîce Hatun’u ibrâ-i âmm-ı katı‘u’n-nizâ‘ ile ibrâ ve iskāt eyledim dedikde, gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Cumâdelûlâ li-sene ihdâ ve semânîn ve elf. Şuhûdü’l-hâl: Umdetü’l-mevâli’l-izâm Abdülbaki Efendi, umdetü’l-müderrisîni’l-kirâm Tosyavî Mehmed Efendi, Hacı Ahmed Ağa b. Mehmed, Osman Efendi b. Mehmed, İbrahim Efendi b. Sefer.