Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 90 Hüküm no: 40 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un menzilini Ümmühani Hatun’a satması Mahmiye-i İstanbul’da Beyceğiz mahallesi sâkinelerinden fahrü’l-muhadderât Şerife Âişe Hatun bt. Seyfizâde Efendi tarafından husûs-ı âti’l-beyâna vekîl olup mezbûreyi ma‘rifet-i şer‘iyye ile ârifân Mahmud Efendi b. Muharrem ve Ahmed Çelebi b. Ali şehâdetleriyle şer‘an vekâleti sâbite olan Ahmed Ağa b. Mehmed meclis-i şer‘-i şerîf-i enverde işbu râfi‘atü’l-kitâb Ümmühani Hatun bt. İbrahim muvâcehesinde bi’l-vekâle ikrâr ve takrîr-i kelâm edip zikri âtî akdin sudûruna değin müvekkile-i mezbûrenin silk-i mülkünde münselik olup mahmiye-i mezbûrede kasab Ivaz mahallesinde vâki‘ bir tarafdan Mîr Ali Hüseyin Paşa mülkü ve bir tarafdan Keresteci Solak veresesi tasarrufunda olan menzil ve bir tarafdan Mustafa Odabaşı mülkü ve bir tarafdan tarîk-i hâs ile mahdûd olup dâhiliyesinde iki bâb fevkānî ve tahtânî oda ve kenîfi ve hâriciyesinde iki bâb tahtânî oda ve bir matbah ve bir sofa ve bir ahur ve bir su kuyusu ve cüneyneyi müştemil mülk menzilini bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mezbûre Ümmühani Hatun’a beş yüz doksan esedî guruş tarafeynden îcâb ve kabûlü hâvî ve şurût-ı müfside ve me‘ânî-i [9a] mubtıladan ârî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzere iştirâ ve tesellüm ve kabûl eyledikden sonra semen-i mezbûr beş yüz doksan esedî guruşu müşteriye-i mezbûre Ümmühani Hatun yedinden tamâmen ahz u kabz eyledi, ba‘de’l-yevm menzil-i mahdûd-ı mezbûr merkūme Ümmühani Hatun’un mülk-i müşterâsıdır keyfe-mâ yeşâ ve yahtâr mutasarrıfe olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâlis aşer min-Cemâziyelâhire li-seneti ihdâ ve semânîn ve elf. Şuhûdü’l-hâl: es-Seyyid Musa Efendi b. es-Seyyid Mehmed el-müezzin, Mehmed Çelebi el-müezzin, Mustafa Çelebi b. Abdullah, Mustafa Efendi el-imâm, Derviş Efendi.