Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 90 Hüküm no: 41 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hassa Beytülmâl Emini Mehmed Ağa’nın vefat eden Bağıcinan Hatun’un terekesinden beytülmâl hissesini tamamen tahsil etmesi Mahmiye-i İstanbul’da Kızılmusluk mahallesi sâkinelerinden olup bundan akdem vefât eden Bağıcinan bt. Abdullah’ın zevci Kapıcı Mehmed Bey’den gayrı vârisi olmamağla terekesinin nısfı irsen mezbûr Mehmed Bey’e ve nısf-ı âharı taraf-ı beytülmâle âid olduğu şer‘an sâbit oldukdan sonra mahmiye-i mezbûrede hâlâ beytülmâl-i hâssa emîni olan Mehmed Ağa b. Ahmed meclis-i şer‘-i şerîf-i enverde tereke-i müteveffât-ı mezbûreye vâzı‘u’l-yed olan işbu râfi‘ü’l-kitâb zevci mezbûr Mehmed Bey tarafından husûs-ı âti’l-beyâna vekîl olup vekâleti mahmiye-i mezbûrede Aksaray kurbünde Mehmed Paşa mahallesi ahâlîsinden Osman Bey b. Ahmed ve yine mahmiye-i mezbûrede Hoca Hayreddin mahallesi ahâlîsinden Hasan Bey b. Mehmed şehâdetleriyle şer‘an sâbite olan Receb Bey b. Mahmud nâm kimesne muvâcehesinde bi’l-emâne ikrâr ve takrîr-i kelâm edip müvekkil-i mezbûrun zevcesi mezbûre Bağıcinan’ın mecmû‘-ı muhallefâtı ba‘de’l-harc ve’l-masraf otuz bin akçeye bâliğ olup beytülmâle âid olan on beş bin akçeyi beytülmâl için müvekkil-i mezbûr Mehmed Bey yedinden tamâmen ahz u kabz eyledim, müteveffâ-yı mezbûrenin terekesinden taraf-ı beytülmâle âid olandan bir nesne bâkī kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâlis aşer min-Cumâdelâhir li-sene ihdâ ve semânîn ve elf. Şuhûdü’l-hâl: Hasan Bey b. Abdullah, Süleyman Çelebi b. Mehmed, Mehmed Bey b. Abdullah, Mustafa Bey b. Abdullah, Ali Çavuş b. Abdullah.