Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 91 Hüküm no: 42 Orijinal metin no: [9a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Efendi’nin Hatib Muhyiddin mahallesi imamı aleyhindeki alacak davasında anlaşma sağlanması Mahmiye-i İstanbul’da Hatib Muhyiddin mahallesinde sâbıkā imâm olan Mahmud Efendi b. Yusuf nâm kimesne meclis-i şer‘-i şerîfde hâlâ mahalle-i mezbûrede imâm olan işbu râfi‘ü’l-kitâb Numan Efendi b. İsmail mahzarında ikrâr ve takrîr-i kelâm edip mezbûr Numan Efendi benden mukaddem zikr olunan Hatîb Muhyiddin mahallesinde imâm iken imâmet-i mezbûreyi bana ferâğ için bi-tarîkı’r-rüşve dört bin iki yüz akçeyi mezbûr Numan Efendi’ye def‘ ü teslîm, mezbûr Numan Efendi dahi ba‘de’l-kabz imâmet-i mezbûreyi bana ferâğ edip ben dahi berât etdirip imâm iken cemâ‘ati beni kabûl etmeyip yine mezbûr Numan Efendi’yi imâm etdirdiklerinde ben dahi mezbûr Numan Efendi’ye bi-tarîkı’r-rüşve teslîm eylediğim dört bin iki yüz akçeyi mezbûr Numan Efendi’den da‘vâ ve taleb eylediğimde beynimizde münâza‘ât-ı kesîre vukū‘undan sonra muslihûn tavassut edip mezbûr Numan Efendi ile beynimizde dört bin akçe üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr dört bin akçeyi mezbûr Numan Efendi yedinden tamâmen ahz u kabz edip bâkī iki yüz akçe da‘vâsından mezbûr Numan Efendi’nin zimmetini ibrâ-i âmm-ı katı‘u’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî aşer min-Cemâziyelâhire li-sene ihdâ ve semânîn ve elf. Şuhûdü’l-hâl: Musli Efendi b. Hızır el-imâm, Ahmed Çelebi b. Receb, Mehmed b. Musli, İbrahim Çelebi b. Mehmed, Rasûl Halîfe b. Ebubekir, Veli b. Mehmed.