Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 91 Hüküm no: 43 Orijinal metin no: [9a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa Ağa’nın varislerinden Meryem’in diğer varis Hatice aleyhindeki miras davasından men olunması Mahmiye-i İstanbul’da Seydi Halîfe mahallesinde sâkin iken bundan akdem vefât eden merhûm Mustafa Ağa b. Hasan’ın verâseti zevce-i metrûkeleri Hadîce bt. Abdullah ve Fâtıma bt. İbrahim ve Âişe bt. Ali ile sulbî kebîr oğulları Yahya Ağa ve İbrahim Ağa’ya ve sulbiye kebîre kızı Meryem Hatun’a münhasıra ve tashîh-i meselesi yüz yirmi sehmden olup sihâm-ı mezbûreden beşer sehmi mezbûrât Hadîce ve Âişe ve Fâtıma’dan her birine ve kırk ikişer sehmi mezbûrân Yahya Ağa ve İbrahim Ağa’dan her birine ve yirmi bir sehmi mezbûre Meryem Hatun’a isâbet etdiği şer‘an sâbit oldukdan sonra mezbûre Meryem Hatun’un zevci ve tarafından husûs-ı âti’l-beyâna vekîl olup vekâleti zâtını ma‘rifet-i şer‘iyye ile ârifân mahalle-i mezbûre sükkânından Bayram b. Abdullah ve mahmiye-i mezbûrede Süleymâniye Câmi‘-i şerîfi kurbünde Molla Gürânî mahallesi sükkânından Mustafa b. Hüseyin nâm kimesneler şehâdetleri ile şer‘an sâbite olan Mustafa Çelebi b. Musa nâm kimesne meclis-i şer‘-i şerîfde işbu bâ‘isü’l-kitâb mezbûre Hadîce mahzarında üzerine da‘vâ ve takrîr-i kelâm edip tereke-i müteveffâ-yı mezbûrdan olup mahmiye-i mezbûrede Ali Paşa-i atîk mahallesinde vâki‘ lede’l-ahâlî ve’l-cîrân ma‘lûmü’l-hudûd olan Şahhuban Sarayı demekle ma‘rûf binâsı müteharrik [muhterik] mülk menzil arsasını ve nıkzını mezbûre Hadîce bi-gayr-ı hakkın ahz u kabz etmişdir suâl olunup arsa-i mezbûre ile nıkz-ı mezbûrdan [9b] yüz yirmi sehmden müvekkilem mezbûre Meryem’in hissesi olan yirmi bir sehmden müvekkileme teslîme mezbûre Hadîce’ye tenbîh olunmak matlûbumdur dedikde gıbbe’s-suâl mezbûre Hadîce cevâbında zevcem müteveffâ-yı mezbûr Mustafa Ağa hâl-i hayâtında ve kemâl-i akl-ı sıhhatinde arsa-i mezbûre ile nıkzının nısfını bin yetmiş sekiz senesi Zilhicce’sinin yirminci günü mahmiye-i mezbûrede Davudpaşa Mahkemesi’nde nâibü’ş-şer‘ olan Derviş Efendi b. Emrullah tarafından irsâl olunan Mahmud Efendi’nin mahalle-i mezbûrede müteveffâ-yı mezbûrun hayâtında sâkin olduğu menzilde akd etdiği meclis-i şer‘de bana hîbe ve teslîm, ben dahi ittihâb ve tesellüm etdiğimde müteveffâ-yı mezbûr Mustafa Ağa zikr olunan nısf arsayı ve nıkzını bana hîbe ve teslîm, ben dahi ittihâb ve tesellüm etdiğim mezbûr Mahmud Efendi’ye tahrîr etdirip mezbûr Mahmud Efendi dahi ba‘de’t-tahrîr nâib-i mûmâ-ileyh Derviş Efendi’ye i‘lâm edip hüccet olunmuş idi deyü def‘le mukābele ve mazmûnu min-külli’l-vücûh takrîr-i meşrûhunu nâtık ve nâib-i mûmâ-ileyhin hatt ü hâtemini hâviye şehr-i mezbûrun yirminci günü ile müverraha hüccet-i şer‘iyye ibraz edicek gıbbe’s-suâl ve’l-inkâr mezbûre Hadîce’den mazmûn-ı hüccet-i mezbûreye beyyine taleb olundukda zeyl-i kitâbda muharrerü’l-esâmî olan Müslimînden eş-Şeyh Mehmed Efendi b. el-merhûm eş-Şeyh Adil ve Hasan Çelebi b. eş-Şeyh el-merhûm Adil ve İmâm Salih Efendi b. Ebubekir ve İbrahim Ağa b. Memi ve Abdullah Efendi b. Hasan nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-hakīka müteveffâ-yı mezbûr Mustafa Ağa hayâtında arsa-i mezbûre ile nıkzının nısfını bizim huzûrumuzda mezbûre Hadîce’ye hîbe ve teslîm ve mezbûr Hadîce dahi ittihâb ve kabûl ve teslîm etmiş idi, biz mazmûn-ı hüccet-i mezbûreye bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘î-i mezbûr vech-i muharrer üzere mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’l-hâmis min-Cumâdelâhire li-sene ihdâ ve semânîn ve elf. Şuhûdü’l-hâl: Hasan Çelebi b. el-merhûm eş-Şeyh Adil Efendi, el-Hâc İbrahim Çelebi b. Ahmed er-râcil, Bayram b. Abdullah, Musa Efendi b. Hüseyin, İbrahim Çelebi b. Ahmed.