Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 93 Hüküm no: 44 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Osman’ın muhâlaa yoluyla boşandığı eşi Muharrem aleyhindeki eşya davasından men olunması Mahmiye-i İstanbul’da Küçükkaraman kurbünde Hâfız Ahmed Paşa odalarının birinde sâkine Fâtıma bt. Osman nâm hatun meclis-i şer‘-i şerîfde sâbıkā zevci olan işbu râfi‘ü’l-kitâb Muharrem b. Ferhad nâm kimesne mahzarında üzerine da‘vâ ve takrîr-i kelâm edip mezbûr Muharrem altı yüz akçe mehr-i müeccel ile beni tezevvüc ve duhûl etdiğinden sonra târîh-i kitâbdan yedi ay mukaddem talâk-ı bâyin ile beni tatlîk edip mehr-i müeccelim olan altı yüz akçe hakkım zimmetinde ve eşyâ-i memlûkemden bir güğüm ve bir tencere ve dört ayaklı bir küpe ve beş ayaklı bir küpe ve bir tasım mezbûr Muharrem yedinde kalmışdır suâl olunup alıverilmesi matlûbumdur dedikde gıbbe’s-suâl mezbûr Muharrem cevâbında müdde‘iye-i mezbûre târîh-i kitâbdan yedi ay mukaddem benim ile zimmetimde mütekarrir olan altı yüz akçe mehr-i müecceli ve nafaka-i iddet-i ma‘lûmesi üzerlerine ve meûnet-i süknâsı dahi kendi üzerine olmak üzere hul‘ olup ve eşyâ-i mezbûreyi bana teslîm, ben dahi hul‘-ı mezbûru kabûl ve eşyâ-i mezbûreyi kabz etdiğimden sonra hukūk-ı zevciyete müte‘allıka da‘vâdan her birimiz âharın zimmetini ibrâ etmiş idik deyü def‘ ile mukābele edicek gıbbe’s-suâl ve’l-inkâr mezbûr Muharrem’den def‘-i mezbûra beyyine taleb olundukda udûl-ı Müslimînden olup zikr olunan odalar sükkânından Halil Efendi b. Yusuf ve Ahmed b. Hacı Nasar nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘iye-i mezbûre târîh-i kitâbdan yedi ay mukaddem mezbûr Muharrem ile zimmetinde mütekarrir olan altı yüz akçe mehr-i müecceli ve nafaka-i iddet-i ma‘lûmesi ve eşyâ-i memlûkesinden bir güğüm ve bir tencere ve dört ayaklı bir küpe ve beş ayaklı bir küpe ve bir tas üzerlerine ve me’ûnet-i süknâsı dahi kendi üzerine olmak üzere hul‘ ve eşyâ-i mezbûreyi mezbûr Muharrem teslîm, mezbûr Muharrem dahi hul‘-ı mezbûru kabûl ve eşyâ-i mezbûreyi kabz edip her biri hukūk-ı zevciyete müte‘allıka da‘vâdan âharın zimmetini ibrâ etmiş idi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘iye-i mezbûre vech-i muharrer üzere mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Cumâdelûlâ li-sene ihdâ ve semânîn ve elf. Şuhûdü’l-hâl: Şükrullah b. Mustafa, Abdi Mustafa b. Hüseyin, Mustafa Çelebi b. el-Hâc Ahmed, İbrahim Çelebi b. Mehmed, Mehmed b. Ramazan.