Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 94 Hüküm no: 45 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Yusuf’un boşandığı eşi Ahmed Çelebi’den mehir ve nafaka alacağını tahsil etmesi Mahmiye-i İstanbul’da Manisalı Çelebi mahallesi sâkinelerinden Hadîce bt. Yusuf nâm hatun meclis-i şer‘-i şerîf-i lâzımü’t-teşrîfde işbu bâ‘isü’l-kitâb zevc-i mutallıkı Ahmed Çelebi b. Abdi Ağa nâm kimesne mahzarında ikrâr-ı tâm ve takrîr-i kelâm edip mezbûr Ahmed Çelebi bundan akdem beni talâk-ı bâyin ile tatlîk etmeğin zimmetinde mütekarrir ve ma‘kūdün-aleyh olan iki bin akçe mehr-i müeccelim ve nafaka-i iddetim için bi’t-terâzi beş yüz akçe cem‘an iki bin beş yüz akçeyi mezbûr Ahmed Çelebi yedinden tamâmen ahz u kabz edip zevciyete müte‘allıka âmme-i de‘âvîden her birimiz âharın zimmetini ibrâ ve iskāt eyledik dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-Cumâdelâhire li-sene ihdâ ve semânîn ve elf. Şuhûdü’l-hâl: Mehmed Çavuş b. Abdullah el-mübâşir, Mehmed Çelebi b. Mehmed, Mustafa b. Habib, Mustafa Efendi el-imâm, Şa‘bân b. Hasan.