Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 94 Hüküm no: 46 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Yusuf’un menzilini Kadı Mustafa Efendi’ye satması Mahmiye-i İstanbul’da Çerâğī Hamza mahallesi sâkinelerinden Âişe bt. Yusuf nâm hatun zâtını ma‘rifet-i şer‘iyye ile ârifân zevci Hüseyin b. Mustafa ve fahrü’l-eimme Abdurrahman Efendi b. Ömer ta‘rîfleri ile mu‘arrefe oldukdan sonra meclis-i şer‘-i şerîf-i enverde hâlâ mahmiye-i mezbûre kādısı olan a‘lemü’l-ulemâi’l-mütebahhirîn efdalü’l-fudalâi’l-müteverri‘în yenbû‘ü’l-fezâil ve’l-me‘âlî, metbû‘ü’l-efâdıl ve’l-e‘âlî, hallâlü’l-müşkilâti’d-dîniyye, keşşâfü’l-mu‘dilâti’l-yakīniye işbu râfi‘ü’l-kitâbi’l-hâlî ani’l-i[r]tiyâb? hazreti Mustafa Efendi tarafından menzil-i âti’l-beyânı iştirâ ve teslîm ve def‘-i semene vekîl olduğu bi-mâ hüve tarîku’s-sübût şer‘an sâbit olan umdetü’s-sâdât es-Seyyid Mehmed Efendi b. es-Seyyid Mehmed muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahalle-i mezbûrede vâki‘ iki tarafdan müvekkil-i müşârün-ileyh mülkü ve bir tarafdan tarîk-i âm ve bir tarafdan el-Hâc Hamza nâm kimesne tasarrufunda olan vakıf menzil ile mahdûd olup bir bâb fevkānî oda ve bir sofa ve bir tahtânî oda ve bir sofa ve kenîf ve bahçe ve bir su kuyusunu hâvî menzilimi vekîl-i mûmâ-ileyh es-Seyyid Mehmed Efendi’ye tarafeynden îcâb ve kabûlü hâvî şurût-ı müfsideden ârî bey‘-i bâtt ile elli bin akçeye bey‘ ve teslîm-i vekîl-i mûmâ-ileyh es-Seyyid Mehmed Efendi dahi müvekkil-i müşârün-ileyh Mustafa Efendi hazretleri için iştirâ ve tesellüm etdiğinden sonra semen-i mezbûr elli bin akçeyi tamâmen vekîl-i mûmâ-ileyh yedinden ahz u kabz eyledim, min-ba‘d menzil-i mahdûd-ı mezbûr müvekkil-i müşârün-ileyh hazretlerinin mülk-i müşterâsıdır, keyfe-mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Cumâdelâhire li-sene ihdâ ve semânîn ve elf. Şuhûdü’l-hâl: Derviş Ağa kethüdâ-yı hazret efendi, İbrahim Efendi b. Abdullah, Ahmed Beşe b. Ömer, Mehmed Beşe b. Receb, Hüseyin Çelebi b. Abdullah.