Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 96 Hüküm no: 48 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi v. Handan’ın Ahmed Çelebi’ye olan borcunu tecil ettirmesi Efendi hazretleri imzâsıyladır. Hüccet, da‘vâ-yı gabn-ı fâhiş, ba‘dehû sulh olundu. Mahmiye-i İstanbul’da Vezir Hanı’nda sâkin bâzergân tâifesinden Abdi v. Handan nâm zimmî meclis-i şer‘-i şerîfde işbu bâ‘isü’l-kitâb es-Seyyid Ahmed Çelebi b. Bahaeddin nâm kimesne mahzarında ikrâr ve takrîr-i kelâm edip bundan akdem bir mücevher altın hançerimi mezbûr es-Seyyid Ahmed Çelebi’ye dört yüz esedî guruşa bey‘ ve teslîm, ol dahi iştirâ ve tesellüm edip semen-i mezbûr dört yüz esedî guruşu mezbûr es-Seyyid Ahmed Çelebi’nin deyn-i şer‘îden zimmetimde hakkı olan altı yüz elli esedî guruşun dört yüz guruşuna takas, ol dahi iştirâ ve tesellüm ve mukāssa etdiğinden sonra bey‘-i mezbûr tağrîr ve gabn-ı fâhiş ile olmuş idi deyü da‘vâ, mezbûr es-Seyyid Ahmed Çelebi dahi gabn ve tağrîri inkâr etmekle ba‘de’n-nizâ‘ muslihûn tavassut edip mezbûr es-Seyyid Ahmed Çelebi ile beynimizde yüz elli esedî guruş üzerine inşâ-i akd-i sulh etdiklerinde ben dahi sulh-ı mezbûru kabûl ve bedel-i sulh olan meblağ-ı mezbûru mezbûr es-Seyyid Ahmed Çelebi’ye bâkī deynim olan iki yüz eli esedî guruşun yüz elli esedî guruşuna takas, mezbûr es-Seyyid Ahmed Çelebi dahi ba‘de’l-mukāssa deyn-i mezbûrumdan bâkī yüz esedî guruş târîh-i kitâbdan üç yüz altmış gün tamâmına değin tecîl eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Cumâdelâhire li-sene ihdâ ve semânîn ve elf. Şuhûdü’l-hâl: es-Seyyid Hasan Çavuş el-mübâşir, Mehmed Çelebi b. Abdullah, Mustafa Çelebi b. el-Hâc Ahmed, Şükrullah Bey b. Mustafa.