Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 97 Hüküm no: 49 Orijinal metin no: [10b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eğerci esnafından Ağya’nın istiğlâl sûretiyle Yeniçerilerin Altmışsekizinci Cemaati Vakfı’ndan borç alması Hüccet-i istiğlâl Mahmiye-i İstanbul’da Sulumanastır kurbünde Hacce Hatun mahallesi sükkânından olup eğerci tâifesinden olan Ağya v. Kirkor nâm Ermeni meclis-i şer‘-i şerîfde dergâh-ı âlî -dâme merci‘an li’l-e‘âlî- yeniçerilerinden Altmışsekizinci Cemâ‘ate mahsûs oda mühimmâtı için mevkūfe nukūda bi’l-fi‘il mütevellî olan işbu bâ‘isü’l-kitâb Mehmed Beşe b. Mustafa nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahalle-i mezbûrede vâki‘ bir tarafdan Tarafzâde demekle şehîr Mehmed Çelebi b. Abdullah mülkü ve bir tarafdan Helvacı Mehmed Çelebi b. Abdullah mülkü ve bir tarafdan Kemhacı Mustafa Çelebi b. Memed Çelebi mülkü ve bir tarafdan tarîk-i âm ile mahdûd hâriciye ve dâhiliyesinde fevkānî ve tahtânî büyût-ı adîde ve hadîka ve ahur [11a] ve hamam ve su kuyusunu ve arsa-i hâliyeyi müştemil menzilimi mütevellî-yi mezbûr Mehmed Beşe’ye bi-tarîkı’l-istiğlâl beş yüz esedî guruşa bey‘ ve teslîm, mezbûr Mehmed Beşe dahi ba‘de’l-iştirâ ve’t-teslîm semen-i mezbûru yedinde olan mâl-ı vakf-ı mezbûrdan bana teslîm ben dahi ahz u kabz etdiğimden sonra menzil-i mahdûd-ı mezbûru ba‘de’t-tahliyeti’ş-şer‘iyye ve’t-tekābuzü’l-mer‘î târîh-i kitâbdan üç yüz altmış gün tamâmına değin yetmiş beş esedî guruşa bana îcâr ve teslîm, ben dahi istîcâr ve tesellüm eyledim dedikde gıbbe’t-tasdîkı’ş-şer‘î semen-i mezbûr ile menzil-i mezbûra mezbûr Ağya’nın babası Kirkor v. Sahak nâm Ermeni emr [ü] kabûlü hâviye kefâlet ile kefîl olmağın mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Cemâziyelâhire sene ihdâ ve semânîn ve elf. Şuhûdü’l-hâl: Hüseyin Beşe b. Hasan, Hüseyin Beşe ser-oda, Mehmed Çelebi b. Yusuf, el-Hâc Mehmed Kapudan, Veli b. Mahmud.