Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 98 Hüküm no: 51 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ali’ye ait olup eski vasisi Mehmed Çelebi’de olan mallarının yeni vasisi olan annesine teslimi Hüccet, vasî yedinden kabz-ı mâl Mahmiye-i İstanbul’da İskenderpaşa mahallesi ahâlîsinden olup vilâyet-i Anadolu’da medîne-i Manisa’da serdâr iken bundan akdem vefât eden el-Hâc Ali Çavuş b. Hızır’ın verâseti zevce-i metrûkeleri Rahime bt. Abdullah ve Hadîce bt. Mehmed nâm hatunlar ile sulbî sagīr oğulları Mehmed Ağa ve Mustafa Ağa ve sulbiye kızları Âişe ve Fâtıma’ya münhasıra olduğu şer‘an sâbit oldukdan sonra sagīr-i mezbûr Mehmed Ağa’nın vâlidesi ve kıbel-i şer‘den mansûbe hâlâ vasîsi olan mezbûre Rahime meclis-i şer‘-i şerîfde sagīr-i mezbûr Mehmed Ağa’nın sâbıkā vasiyy-i mansûbu olan işbu bâ‘isü’l-kitâb Mehmed Çelebi b. Halil nâm kimesne mahzarında ikrâr ve takrîr-i kelâm edip mezbûr Mehmed Çelebi’nin hâl-i vesâyetinde müteveffâ-yı mezbûrun terekesi veresesi beynlerinde alâ-mâ farazallâhu te‘âlâ taksîm ve tevzî‘ olundukda tereke-i müteveffâ-yı mezbûrdan sagīr-i mezbûr Mehmed Ağa’nın hissesine isâbet etmekle mezbûr Mehmed Çelebi’nin makbûzu olup sekiz yüz yetmiş esedî guruşa mukavvem olan beynimizde ma‘lûm eşyâ ile nakid yüz yetmiş esedî guruşu mezbûr Mehmed Çelebi bana teslîm, ben dahi bi’l-vesâye yedinden ahz u kabz eyledim, min-ba‘d tereke-i müteveffâ-yı mezbûrdan mezbûr Mehmed Çelebi yedinde bir nesne bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-Cumâdelâhire li-sene ihdâ ve semânîn ve elf. Şuhûdü’l-hâl: Es-sâbikūn.