|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 341 Hüküm no: 473 Orijinal metin no: [260-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Gika’nın vârisi olduğu amcasının oğlu Dido’nun terekesini Mustafa Halîfe b. Bahşî’den teslim aldığı
Havâss-ı aliyye kazâsına tâbi‘ Hasköy’de sâkin iken mürd olan Dido v. Koned nâm zimmînin ibn-i ammi ve bi’l-inhisâr vârisi olan Gika v. Kuka nâm zimmî meclis-i şer‘-i hatîr-i lâzımü’t-tevkīrde işbu bâ‘isü’l-kitâb hâlen Vâlide Sultan hazretlerinin evkāfına bi’l-fi‘il mütevellî olan Hasan Çelebi tarafından vekîl-i şer‘îsi olan Mustafa Halîfe b. Bahşî mahzarında bi’t-tav‘i’s-sâf ikrâr ve i‘tirâf edip mûrisim mürd-i merkūm Did[o] Vâlide Sultan hazretlerinin defterli re‘âyâsından olmağla muhallefâtına merkūm Mustafa Halîfe taraf-ı vakıfdan vaz‘-ı yed eyleyip muhallefât-ı merkūmdan yedinde olan nakd-i râyic fi’l-vakt iki bin akçe ve ber-mûceb-i defter cemî‘ eşyâsını mezkûr Mustafa Halîfe yedinden bi’t-tamâm ve’l-kemâl ahz u kabz eyleyip husûs-ı muhallefât-ı mezkûreye müte‘allik cemî‘ da‘vâ ve nizâ‘dan zimmetini ibrâ-i âmm-ı kātı‘ü’n-nizâ‘la ibrâ ve ıskāt eyledim, ba‘de’l-yevm benden veyâhud vekîlimden husûs-ı mezkûreye müte‘allik da‘vâ sâdıra olursa lede’l-hükkâmi’l-kirâm mesmû‘a ve makbûle olmasın dedikde mukırr-ı merkūmun ikrâr-ı meşrûhu vekîl-i merkūm talebi ile ketb olundu. Hurrire? fî evâili Recebi’l-ferd li sene ihdâ ve hamsîn ve elf.
Şuhûdü’l-hâl: Mehmed Efendi b. Ali, Ali b. Abdullah, Hüseyin b. Ali, Ahmed b. Mehmed ve gayruhüm
|