.:: İstanbul Kadı Sicilleri ::.


Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 345
Hüküm no: 481
Orijinal metin no: [264-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ali b. Bayram’ın tasarrufundaki tarlaların tasarruf hakkını İvaz b. Hüseyin’e devrettiği

Vilâyet-i Anadolu’da vâki‘ Aktaş kasabasına tâbi‘ Kozyaka nâm karye sükkânından Ali b. Bayram meclis-i şer‘-i hatîr-i lâzımü’t-tevkīrde İvaz b. Hüseyin nâm kimesne tarafından husûs-ı âti’l-beyânı iştirâya vekîl olup vekâleti nehc-i şer‘î üzre sâbite olan mefharü’l-kuzât Mahmud Efendi b. Bayezid mahzarında bi’t-tav‘i’s-sâf ikrâr ve i‘tirâf edip karye-i mezbûrede mevâzi‘-i müte‘addidede vâki‘ inde’l-ahâlî ve’l-cîrân ma‘lûmü’l-hudûd olup tefvîz-i âtî sudûruna değin mutasarrıf olduğum tahmînen bir müd tohum isti‘âb eder tarlaların hakk-ı tasarrufunu sâhib-i arz ma‘rifetiyle mûmâ-ileyh Mahmud Efendi’nin müvekkili mezbûr İvaz’a tefvîz edip merkūm Mahmud Efendi dahi vekâleti hasebiyle tefevvuz ve kabz edip mukābele-i tefvîzde yedinden nakd-i râyic fi’l-vakt yirmi beş riyâlî guruş ve mezbûr İvaz’ın oğlu Receb nâm kimesne yedinden bin beş yüz akçe ki cem‘an üç bin beş yüz akçeyi yedlerinden bi’t-tamâm ahz u kabz eyleyip arâzi-i mezbûreyi mahallinde kabza ve tasarrufa mezbûr İvaz’a taslît eyledim dedikde, mukırr-ı merkūmun ikrâr-ı meşrûhunu vekîl-i merkūm Mahmud Efendi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâsıtı Ramazâni’l-mübârek li sene ihdâ ve hamsîn ve elf.


Şuhûdü’l-hâl: ( )