Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 99 Hüküm no: 53 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime Hatun’un vefat eden eşi Ali Çavuş’tan intikal eden hissesini vekili Mehmed Çelebi’den tamamen tahsil etmesi Vilâyet-i Anadolu’da medîne-i Manisa’da sâkin ve serdâr iken bundan akdem vefât eden el-Hâc Ali Çavuş b. Hızır Çavuş’un verâseti mahmiye-i İstanbul’da İskenderpaşa mahallesinde sâkine zevcesi Rahime bt. Abdullah ve medîne-i mezbûrede sâkine âhar zevcesi Hadîce bt. Mehmed nâm hatunlar ile sulbî sagīr oğulları Mehmed Ağa ve Mustafa Ağa ve sulbiye sagīre kızları Âişe ve Fâtıma’ya münhasıra olduğu şer‘an sâbit oldukdan sonra mezbûre Rahime tarafından husûs-ı âti’l-beyâna vekîl olup vekâleti zâtını ma‘rifet-i şer‘iyye ile ârifân Ali Beşe b. Halil ve diğer Ali Beşe b. Ahmed nâm kimesneler şehâdetleri ile şer‘an sâbite olan el-Hâc Mehmed Odabaşı b. Murad nâm kimesne meclis-i şer‘-i şerîfde sagīr-i mezbûr ( ) kıbel-i şer‘den mansûb vasîsi olan işbu bâ‘isü’l-kitâb Mehmed Çelebi b. Halil nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Rahime bundan akdem müteveffâ-yı mezbûr zimmetinde mütekarrir olan yüz yirmi guruş mehr-i müeccelini tereke-i vâfiye-i müteveffâ-yı mezbûra vâzı‘u’l-yed olanlardan ahz u kabz etdikden sonra bâkī terekeden yetmiş iki sehmden hissesi olan altı sehmi dahi ahz u kabza ve kendüye îsâle ve kabz ve îsâl mütevakkıf olduğu umûrun küllîsine tarafından mukaddemâ mezbûr Mehmed Çelebi’yi vekîl edip mezbûr Mehmed Çelebi dahi ba‘de-kabûli’l-vekâle müvekkile-i mezbûrenin mehr-i mezbûru olan yüz yirmi guruşu ve hisse-i irsiyesi olan yedi yüz yirmi yedi buçuk esedî guruşu tereke-i müteveffâ-yı mezbûra vâzı‘u’l-yed olanlardan ahz u kabz etdiğinden sonra cem‘an makbûzu olan sekiz yüz kırk yedi buçuk esedî guruşu müvekkileme teslîm, müvekkilem dahi tamâmen ahz u kabz edip tereke-i müteveffâ-yı mezbûrdan mezbûr Mehmed Çelebi yedinde bir akçe ve bir habbe hakkı bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Cumâdelâhire sene ihdâ ve semânîn ve elf. Şuhûdü’l-hâl: Mehmed Çelebi b. Abdullah, Ebubekir b. Hüseyin, İbrahim Çelebi b. Hasan, Mehmed b. Hüseyin, Mehmed Çelebi b. Bali.