Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 100 Hüküm no: 54 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anton v. Minas’ın menzil arsasını Mısır Valisi İbrahim Paşa Vakfı’na satması Dârü’l-hilâfeti’l-aliyye Kostantıniyyetü’l-mahmiyede Şeyh Ferhad mahallesinde sâkin Papa Anton v. Minas nâm zimmî meclis-i şer‘-i şerîf-i Ahmedî ve mahfil-i dîn-i münîf-i Muhammedî’de hâlâ Mısır valîsi olan düstûr-ı ekrem müşîr-i efham mümehhidü bünyâni’d-devleti ve’l-ikbâl müşeyyidü erkâni’s-sa‘âdeti ve’l-iclâl nâzımü menâzimi’l-ümem muslihü mesâlihi’l-âlem hazreti İbrahim Paşa’nın gallesi kasaba-i Çorlu ve kasaba-i Hacıoğlupazarı ve kasaba-i Kasımpaşa’da müceddeden binâ ve ihyâ buyurdukları çeşmeleri ve mahmiye-i mezbûrede merhûm Şeyh Ebulvefâ Câmi‘-i şerîfi kurbünde ihyâ eyledikleri sebîlleri ta‘mîr ve terkîmi için meşrûta vakıfları olan nukūdun bi’l-fi‘il mütevellîsi olup nukūd-ı mevkūfe-i mezbûre ile akār iştirâsı meşrûtu olan umdetü’l-emâsil ve’l-a‘yân Mahmud Ağa b. ( ) mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahalle-i mezbûrede vâkı‘a bir tarafdan Marat v. Kirkor mülküne ve bir tarafdan Ömer Beşe b. Abdullah mülküne ve bir tarafdan Aleksan nâm hayyât zimmî mülküne ve bir tarafdan Haçador v. Honsar nâm zimmî mülküne müntehiye tûlen ve arzen bi-hesâb-ı terbî‘î iki yüz kırk sekiz zirâ‘ binâsı muhterik menzil arsası cümle tevâbi‘ ve levâhıkı ve kâffe-i hukūk-ı merâfıkı ile mütevellî-yi mûmâ-ileyh Mahmud Ağa’ya tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile beş yüz esedî guruşa bey‘ ve teslîm ol dahi vâkıf-ı mûmâ-ileyhin vakfı olup nukūd-ı mevkūfe-i mezbûre nemâsında etdiği şurût-ı galle arsa-i mezbûrede câriye olmak üzere iştirâ ve tesellüm ve semen-i mezbûr beş yüz esedî guruşu yedinde olan mâl-ı vakf-ı mezbûrdan bana teslîm, ben dahi ahz u kabz eyledim. Min-ba‘d arsa-i mahdûde-i mezbûre vâkıf-ı mûmâ-ileyhin vakfı müstagallâtından olup benim kat‘an alâkam kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Cemâziyelâhire li-sene ihdâ ve semânîn ve elf. Şuhûdü’l-hâl: Umdetü’l-hutebâ Abdürrezzak Efendi b. ( ), Ahmed Çelebi b. Mirza müezzin, umdetü’l-vâ‘izîn Ahmed Efendi b. Ömer el-imâm, Mustafa Çelebi b. el-Hâc Ahmed, el-Hâc Halil b. el-Hâc İbrahim, Mehmed Çelebi b. Abdullah, İbrahim Çelebi b. Ahmed, Şükrullah Bey b. Mustafa.