|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 346 Hüküm no: 483 Orijinal metin no: [265-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vakfa ait harap durumdaki bir oda ile bir sofa ve mahzenin Ahmed b. Yakub’a icâreteynle kiralandığı
Havâss-ı aliyye kazâsına tâbi‘ Hasköy mahallâtından Abdüsselam mahallesinde vâki‘ Abdüsselam nâm kimesne binâ eylediği mescide imâm olan Muzaffer Halîfe b. Abdullah nâm kimesne mahfil-i kazâda yine mahalle-i mezbûrede vâki‘ merhûm Mehmed b. Abdülkerim nâm kimesne vakfından olup tevliyet ve süknâsı mescid-i mezbûrda imâm olan kimesneye meşrût olup bir tarafdan yine vakf-ı mezbûrdan benim sâkin olduğum menzil ve bir tarafdan mescid-i mezbûr cidârı ve bir tarafdan ( ) ve iki tarafdan tarîk-i âm ile mahdûd ve mümtâz olan bir bâb tahtânî odayı ve bir sofa ve bir mahzen mürûr-ı eyyâm ve kürûr-ı a‘vâm ile bi’l-külliye harâba müşrif olup aslâ kābil-i süknâ olmayıp vakf-ı mezbûrda imâret ve meremmete müsâ‘ade olmadığı cihetden îcâr olunmak vakf-ı şerîfe dahi evlâ ve enfa‘ olmağın işbu bâ‘isü’l-kitâb Ahmed b. Yakub nâm kimesne beş yüz akçe icâre-i mu‘accele ve beher şehr on beş akçe icâre-i müeccele ile tevliyetim hasebiyle îcâr edip mezbûr Ahmed dahi istîcâr ve kabûl edip ve zikr olunan beş yüz akçe icâre-i mu‘acceleyi vakıf için ahz u kabz eyledim ba‘de’l-yevm zikr olunan bir bâb oda ve bir sofa ve mahzen merkūm Ahmed’in mülk-i müfevvazıdır dedikde mütevellî-i merkūmun ikrâr-ı meşrûhunu el-mukarru lehü’l-mezbûr Ahmed bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâsıtı Ramazâni’l-mübârek sene ihdâ ve hamsîn ve elf.
Şuhûdü’l-hâl: Mehmed Bey b. Mustafa bevvâb-ı sultânî
|