.:: İstanbul Kadı Sicilleri ::.


Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 354
Hüküm no: 496
Orijinal metin no: [270-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Râziye bt. Mustafa’nın tasarrufundaki vakıf odayı şehremîni olan Musa Efendi’ye devrettiği

Havâss-ı aliyye kazâsına tâbi‘ Hasköy mahallâtından Pîrî Paşa mahallesinde sâkine Râziye bt. Mustafa nâm hâtun meclis-i şer‘-i hatîr-i lâzımü’t-tevkīrde işbu bâ‘isü’l-kitâb hâlen şehremîni olan umdetü’l-a‘yân Musa Efendi b. ( ) muvâcehesinde bi’t-tav‘i’s-sâf ikrâr ve takrîr-i kelâm edip merhûm ve mağfûrun-leh Pîr[î] Mehmed Paşa Vakfı’ndan olup mahalle-i mezbûrede vâki‘ iki tarafı vakf-ı mezbûr bostanı ve bir tarafı Mehmed b. Hasan sâkin olduğu oda ve bir tarafı tarîk-i âm ile [271] mahdûd ve mümtâz bir bâb odayı müştemil olup vakf-ı mezbûrdan beher mâh on dört akçe icâre-i mu‘accele ve müeccele ile mutasarrıf olduğum odanın hakk-ı tasarrufunu vakf-ı mezbûrun mütevellîsi izniyle mûmâ-ileyh Musa Efendi’ye tefvîz edip ol dahi vech-i mübeyyen üzre tefevvuz ve kabûl eyleyip mukābele-i tefvîzde yed-i şerîf-i pâkinden? nakd-i râyic fi’l-vakt altı bin akçe alıp kabz eyledim, mâdem ki beher mâh zikr olunan odanın icâre-i müeccelesin vakf-ı mezbûr zâbitlerine edâ ve îfâ eyleye tasarrufuna bir ferd mâni‘ olmaya dediğinde mukırra-i merkūmenin ikrâr-ı meşrûhasını mûmâ-ileyh Musa Efendi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Muharremi’l-harâm li sene isneyn ve hamsîn ve elf.


Şuhûdü’l-hâl: Ali Beşe b. Abdullah, Mehmed Beşe b. Ahmed, Ali Beşe b. Mehmed, Ahmed b. Musa, Mehmed Bey b. Abdullah, Ali b. Abdullah ve gayruhüm