|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 355 Hüküm no: 497 Orijinal metin no: [271-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Âişe bt. Mehmed’in Rus asıllı câriyesi Payidar’ı azat ettiği
Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkine Âişe bt. Mehmed nâm hâtun tarafından husûs-ı âti’l-beyân i‘tâka vekîl olup vekâleti yine karye-i mezbûre sükkânından İbrahim Beşe b. Abdullah ve Hüseyin b. Ali şehâdetleri ile sâbite olan Mahmud Çelebi b. Mehmed nâm serrâc-ı sultânî mahfil-i kazâda müvekkilem mezbûre Âişe’nin silk-i mülkünde münselik olan orta boylu açık kaşlı gök elâ gözlü sarışın Rûsiyyetü’l-asl Pâyidar bt. Abdullah nâm câriye-i memlûkesinin muvâcehesinde bi’l-vekâle ikrâr ve takrîr-i kelâm edip sıfat-ı mezkûre ile mevsûfe olan câriye-i memlûkesini vekâletim hasebiyle niyyet-i hâlisa-i vâfire ve taviyyetin tayyibe-i sâfiye ile hasbeten lillâhi’l-hallâk tahrîr ve i‘tâk [272] ve mülkünden izâle ve ihrâc ve silk-i ahrâr-ı asliyyîne indirâc eyledim, ba‘de’l-yevm mezbûre Pâyidar sâir ahrâr-ı asliyyât gibi hürre olup sâir mevâlî için şer‘an sâbit olan hakk-ı velâdan gayrı hakkı kalmadı dedikde vekîl-i merkūm Mahmud Çelebi’nin ikrâr-ı meşrûhunu merkūme câriye bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Muharremi’l-harâm li sene isneyn ve hamsîn ve elf.
Şuhûdü’l-hâl: Ahmed Ağa b. Abdülmennân, Mehmed Çelebi b. Ahmed, Mustafa Çelebi b. Bekir? es-Serrâc, Abdi Bey b. Şaban, Ali Dede [b.] Hüseyin, Mehmed Bey b. Osman
|