.:: İstanbul Kadı Sicilleri ::.


Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 355
Hüküm no: 498
Orijinal metin no: [271-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Rahime Hâtun’un Rus asıllı câriyesi Zamâne’yi azat ettiği

Havâss-ı aliyye kazâsına tâbi‘ Ahmed Çelebi mahallesinde sâkine Rahime bt. ( ) nâm hâtun tarafından husûs-ı âti’l-beyânı i‘tâka vekîl olup vekâleti yine karye-i mezbûre sükkânından İbrahim Beşe b. Abdullah ve Hüseyin b. Ali şehâdetleri ile sâbite olan zevci Mahmud Çelebi b. Mehmed nâm serrâc-ı sultânî mahfil-i kazâda müvekkilem mezbûre Rahime’nin silk-i mülkünde münselik olan orta boylu açık kaşlı Rûsiyyetü’l-asl Zamâne bt. Abdullah nâm câriye-i memlûkesinin muvâcehesinde bi’l-vekâle ikrâr ve takrîr-i kelâm edip sıfat-ı mezkûre ile mevsûfe olan câriye-i memlûkesini vekâletim hasebiyle niyyet-i hâlisa-i vâfire ve taviyyetin tayyibe-i sâfiye ile hasbeten lillâhi’l-hallâk tahrîr ve i‘tâk ve mülkünden izâle ve ihrâc ve silk-i ahrâr-ı asliyyîne indirâc eyledim, ba‘de’l-yevm mezbûre Zamâne sâir ahrâr-ı asliyyîn gibi hürre olup sâir mevâlî için şer‘an sâbit olan hakk-ı velâdan gayrı hakkı kalmadı dedikde vekîl-i merkūm Mahmud Çelebi’nin ikrâr-ı meşrûhunu merkūme câriye bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Muharremi’l-harâm li sene isneyn ve hamsîn ve elf. Şuhûd[ü’l-hâl]: es-Sâbıkūn