.:: İstanbul Kadı Sicilleri ::.


Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 359
Hüküm no: 506
Orijinal metin no: [274-2, Arapça]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Cânem v. Anberkeş’in Selim Ağa b. Murad’a borcu olduğu

Anadolu-yı ma‘mûre vilâyetinden kasaba-i Eğin mahallâtından Nordik mahallesinde sâkin olan Cânem v. Anberkeş nâm zimmî tağyîr ve tahrîfden korunmuş olan meclis-i şer‘-i şerîf ve mahfil-i dîn-i münîfde bâ‘is-i hâze’l-kitâb fahrü’l-akrân Selim Ağa b. Murad’a üzerinde ve zimmetinde mikdârı ve nisâbı iki yüz doksan kıt‘a riyâlî guruş diye mu‘teber olan sikke-i meskûke karz-ı şer‘îden ve müşterâ makbûz bi-yedihî çuka bedelinden kıt‘a-i mezkûreden on kıt‘a riyâlî guruş ki mezbûr çuka bedeli târih-i kitâbdan sene-i kâmile tamâmına değin müeccel olmak üzre deyni olduğunu ikrâr-ı sahîh-i şer‘î edip dâyin-i mezbûr tarafından da vicâhen tasdîk olundukdan sonra Hanem v. Cânem ve Monelke v. Anberkeş nâm zimmîler meblağ-ı mezkûrun tamâmına kefîl olup sonra her biri diğerinin zimmetine lâzım olana emr-i kabûlü hâviye kefâletle kefîl oldular. Cerâ zâlike ve hurrire fi’l-yevmi’s-sâmin aşer min şehri Saferi’l-hayr sene isneyn ve hamsîn ve elf.


Şuhûdü’l-hâl: Mahmud Çelebi b. Mehmed, Mehmed b. İbrahim el-Müezzin, Mustafa b. Ahmed, Mehmed b. Mustafa, Mahmud b. Mustafa, Aydın b. İbrahim, Ali b. Abdullah