|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 362 Hüküm no: 512 Orijinal metin no: [276-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ramazan b. Sefer’in Eğin’deki bağını Serkis v. Nikola’ya sattığı
Vilâyet-i Anadolu’da vâki‘ Eğin kazâsına tâbi‘ Danik nâm karye sükkânından Ramazan b. Sefer nâm kimesne meclis-i şer‘-i hatîr-i lâzımü’t-tevkīrde işbu bâ‘is-i hâze’s-sifr Serkis v. Nikola nâm Ermeni mahzarında bi’t-tav‘i’s-sâf ikrâr ve takrîr-i kelâm edip silk-i mülkümde münselik olup karye-i mezbûrede vâki‘ bir tarafdan Mustafa b. Nasuh bağı ve bir tarafdan Bâli v. Harcan bağı ve bir tarafdan müşterî-i mezbûr bağı ve bir tarafdan taşlık ile mahdûd ve mümtâz olan bir kıt‘a mülk bağımı mezbûr Serkis’e tâmmü’l-vezn sahîhü’l-ayâr yirmi riyâlî guruşa bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve mebî‘-i mezbûru mahallinde kabza taslît eyledim, ba‘de’l-yevm zikr olunan bir kıt‘a bağ mezbûr Serkis’in mülk-i müşterâsıdır keyfemâ yeşâ ve yehtâr [277] mutasarrıf olsun dedikde mukırr-ı merkūmun ikrâr-ı meşrûhunu el-mukarru lehü’l-mezbûr Serkis bi’l-muvâcehe tasdîk ve bi’l-müşâfehe tahkīk edecek mâ hüve’l-vâki‘ bi’t-taleb ketb olundu. Tahrîren fî evâsıtı şehri Rebî‘ilevvel sene isneyn ve hamsîn ve elf.
Şuhûdü’l-hâl: ( )
|