Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 102 Hüküm no: 56 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoca Hayreddin Vakfı mütevellisi Fatıma Hatun’un Mehmed Çelebi aleyhindeki vakıf arsa iddiasından men olunması Dârü’l-hilâfeti’l-aliyye Kostantıniyyetü’l-mahmiyede merhûm Hoca Hayreddin Vakfına meşrûtiyet üzere mütevellî olan fahrü’l-muhadderât Fâtıma Hatun’un vâlidesi ve tarafından umûr-ı vakfı ikāmete kāimmakām ve husûs-ı âti’l-beyâna sâbitü’l-vekâle vekîli olan Mihrimah bt. ( ) nâm hatun meclis-i şer‘-i şerîf-i lâzımü’t-teşrîfde vakf-ı mezbûrdan zikri âtî arsaya vâzı‘u’l-yed olan işbu bâ‘isü’l-kitâb Mehmed Çelebi b. Nezir nâm kimesne mahzarında üzerine da‘vâ ve takrîr-i kelâm edip vakf-ı mezbûrdan olup mahmiye-i mezbûrede Çelebioğlu mahallesinde vâkı‘a iki tarafdan Dâmâd Abdurrahman [12b] Efendi Vakfı ve bir tarafdan tarîk-i âm ve bir tarafdan tarîk-i hâs ile mahdûd arsa müvekkilem mezbûre Mihrimah Hatun bin yetmiş beş senesinde icâre-i mu‘accele ve müeccele-i ma‘lûmeteyn ile mezbûr Mehmed Çelebi’ye icâr ve teslîm ve icâre-i mu‘accelesine mahsûb olmak üzere binâya izin verip mezbûr Mehmed Çelebi dahi istîcâr ve teslîm edip zabt üzere iken arsa-i mezbûreyi meccânen taraf-ı vakf-ı mezbûra ferâğ ve kasr-ı yed edip ben dahi vakıf için tefevvüz ve kabûl etdiğimden sonra mezbûr Mehmed Çelebi arsa-i mahdûde-i mezbûreyi bi-gayr-ı hakkın zabt ve fuzûlen üzerine ebniye ihdâs etmişdi, suâl olunun ebniye-i mezbûrenin kal‘ı vakfa muzır olmağla ebniye-i mezbûreyi kal‘ u ref‘a ve arsa-i mahdûde-i mezbûreyi vakfa fâriğa ve vakıf için bana teslîme mezbûr Mehmed Çelebi’ye tenbîh olunmak matlûbumdur [dedikde] gıbbe’s-suâl mezbûr Mehmed Çelebi cevâbında vech-i muharrer üzere arsa-i mahdûde-i mezbûre tasarrufumda olup binâya me’zûn olmağla üzerine mahsûb olmak üzere ebniye ihdâs etmiş idim deyüp vech-i muharrer üzere ferâğın inkâr edicek müdde‘iye-i mezbûreden müdde‘âsın mübeyyine beyyine taleb olundukda ityân-ı beyyineden izhâr-ı acz ile istihlâf etmeğin arsa-i mahdûde-i mezbûreyi vech-i muharrer üzere vakf-ı mezbûra fâriğ olmayıp kasr-ı yed etmediğine mezbûr Mehmed Çelebi’ye yemîn teklîf olundukda mezbûr Mehmed Çelebi dahi alâ-vefki’l-mesûl yemîn billâhi’l-aliyyi’l-a‘lâ etmeğin mûcebince müdde‘iye-i mezbûre vech-i mübeyyen üzere mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâlis aşer min-Cumâdelâhire li-sene ihdâ ve semânîn ve elf. Şuhûdü’l-hâl: Mehmed Çelebi b. Abdullah, Mustafa Çelebi b. el-Hâc Ahmed, Cafer Beşe b. Ali, İbrahim Çelebi b. Ahmed, Berber Ahmed b. Abdullah.