Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 103 Hüküm no: 57 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Edirneli Abdullah Bey’in menzilini Mehmed Beşe’ye satması Medîne-i Edirne’de Kıyık mahallesi sükkânından Abdullah Bey b. Ahmed nâm kimesne meclis-i şer‘-i şerîfde işbu bâ‘isü’l-kitâb Mehmed Beşe b. Muharrem nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahmiye-i İstanbul’da Fethiye mahallesinde vâki‘ bir tarafdan umdetü’l-müderrisîn Ali Efendi mülkü ve bir tarafdan mahalle-i mezbûre imâm-ı evveline meşrût vakıf menzil ve bir tarafdan kız karındaşı Saliha Hatun mülkü ve bir tarafdan tarîk-i âm ile mahdûd muhavvata-i hâriciyesi tahtânî bir bâb oda ve bir harâbe hamam ve bir ahur ve bir kenîf ve fevkānîsi bir bâb odayı ve muhavvata-i dâhiliyesi bir bâb tahtânî oda ve bahçe ve kenîf ve bir bâb fevkānî oda ve bir sofayı müştemil menzilimi cümle tevâbi‘ ve levâhıkı ile mezbûr Mehmed Beşe’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile otuz sekiz bin akçeye bey‘ ve teslîm mezbûr Mehmed Beşe dahi iştirâ ve tesellüm etdiğinden sonra semen-i mezbûr otuz sekiz bin akçeyi mezbûr Mehmed Beşe yedinden tamâmen ahz u kabz eyledim, min-ba‘d menzil-i mahdûd-ı mezbûr merkūm Mehmed Beşe’nin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî aşer min-Cemâziyelâhire li-sene ihdâ ve semânîn ve elf. Şuhûdü’l-hâl: Mustafa Bey b. Hızır Bey, Mustafa Beşe b. Şa‘bân, Abdullah Efendi b. Mehmed, Mustafa Efendi b. Receb, Mustafa Beşe b. Abdullah.