.:: İstanbul Kadı Sicilleri ::.


Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 362
Hüküm no: 513
Orijinal metin no: [277-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yasemin bt. Abdullah’ın evini kocası İslâm b. Abdullah’a hibe ettiği

Havâss-ı aliyye kazâsına tâbi‘ Hasköy mahallâtından Abdüsselam mahallesinde sâkine Yasemin bt. Abdullah nâm hâtun meclis-i şer‘-i hatîr-i lâzımü’t-tevkīrde işbu bâ‘isü’l-kitâb zevci olan İslâm b. Abdullah nâm kimesne mazharında bi’t-tav‘i’s-sâf ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ üç tarafdan masraf kâtibi olan Ali Efendi mülkü ve bir tarafdan tarîk-i âm ile mahdûd ve mümtâz olup bir bâb tahtânî odayı ve eşcâr-ı müsmire ve gayr-ı müsmireyi müştemil olan mülk menzilimi zevcim mezbûr İslâm’a hibe-i sahîha-i şer‘iyye ile hibe ve temlîk edip ba‘de’t-tahliyeti’ş-şer‘iyye teslîm eyledim ol dahi meclis-i hibede oda-i mezbûru cümle tevâbi‘ ve levâhıkı ile kabz ve kabûl [ve] ittihâb eyledi, ba‘de’l-yevm menzil-i mahdûd zevcim mezbûr İslâm’ın mülk-i mahzıdır keyfemâ yeşâ ve yehtâr mutasarrıf olsun dedikde vâhibe-yi mezkûreyi kelimât-ı meşrûhasında mevhûb-ı mezkûr İslâm dahi vicâhen tasdîk ve şifâhen tahkīk edecek mâ vaka‘a bi’t-taleb ketb olundu. Tahrîren fî evâhiri şehri Rebî‘ilevvel sene isneyn ve hamsîn ve elf.


Şuhûdü’l-hâl: Muslu b. Veli, Ebûbekir b. ( ), Ali b. Abdullah, İbrahim Efendi [b.] Hüsrev el-İmâm, Mehmed b. Kadri, Ahmed Bey, Dilâver Bey b. Abdullah, Mehmed b. Abdullah