|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 363 Hüküm no: 514 Orijinal metin no: [277-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vefat eden Mehmed Bey b. Abdülmennân’ın borçlarının ödenip yetimlerinin ihtiyaçları için evinin müzâyede ile satıldığı
Havâss-ı aliyye kazâsına tâbi‘ Hasköy mahallâtından Keçeci mahallesinde sâkin iken bundan akdem müteveffâ olan Mehmed Bey b. Abdülmennân nâm kimesnenin verâseti zevce-i metrûkesi Emine bt. Hasan nâm hâtuna ve sulbî kebîr oğlu Ahmed’e ve sagīr oğulları Ali ve Süleyman’a münhasıra olduğu şer‘an mütehakkik oldukdan sonra mezbûrân Ahmed ve Âmine asâleten ve sagīrân-ı mezbûrân Ali ve Süleyman’ın kıbel-i şer‘-i enverden tesviye-i umûruna vasî olup vesâyeti sâbite olan Ali Dede b. Hüseyin mahfil-i kazâda işbu bâ‘is-i hâze’s-sifr Mihal v. Yani muvâcehesinde her biri asâleten ve vesâyeten ikrâr ve takrîr-i kelâm eyleyip merhûm-ı merkūm Mehmed Bey medyûnen vefât edip nukūd ve menkūlünden mahalle-i mezbûrede vâki‘ bir tarafdan Ganîzâde Efendi bahçesine müntehî ve bir tarafdan Ahmed Ağa mülküne müntehî ve bir tarafdan tarîk-i âmma müntehî ve bir tarafdan müşterî-i merkūm Mihal ile müşterek tarîk-i hâs ile mahdûd ve mümtâz olan bir bâb tahtânî menzil ve bir kileri ve bir bâb matbahı ve bir ahırı ve bi’r-i mâ’ı ve kenîfi ve eşcâr-ı müsmire ve gayr-ı müsmireyi müştemil olan mülk menzilden gayrı deyne vefâ eder mâlı olmayıp cihet-i karz-ı şer‘îden Mahmiye-i İstanbul’da Sultan Süleyman kurbunda sâkin[e] Rahime bt. Abdullah nâm hâtuna olan yüz kıt‘a riyâlî guruş deyn-i müsbeti ve sagīrân-ı merkūmânın zarûret-i nafaka ve kisveleri için zikr olunan menzilin bey‘i lâzım gelmeğin cânib-i şer‘-i kavîmden bey‘ine izin ve icâzet [278] verilip müddet-i medîd[e] beyne’t-tâlibîn nidâ ve tezâyüd olunup rağabât-ı nâs bi’l-külliye munkatı‘a oldukdan sonra menzil-i mezbûr merkūm Mihal üzerinde iki yüz yetmiş kıt‘a riyâlî guruşda karâr edip ve ziyâde ile tâlib-i âhar dahi zuhûr etmemeğin menzil-i merkūmu asâleten ve vesâyeten merkūm Mihal’e müteveffâ-yı merkūm Mehmed Bey’in zarûret-i deyni ve sagīrân-ı merkūmânın zarûret-i nafakaları için merkūmü’l-mikdâr iki yüz yetmiş beş kıt‘a riyâlî guruşa bey‘-i bâtt-ı kat‘î ile bey‘ eyleyip ol dahi vech-i muharrer üzre iştirâ ve tesellüm ve temellük eyledikden sonra semeni olan meblağ-ı mezbûr iki yüz yetmiş beş kıt‘a riyâlî guruşu yedinden asâleten ve vesâyeten ahz u kabz eyledik, ba‘de’l-yevm menzil-i mezbûr merkūm Mihal’in mülk-i müşterâsıdır keyfemâ yeşâ ve yehtâr mutasarrıf olsun dediklerinde mukırrûn-u merkūmûnun asâleten ve vesâyeten sâdır olan ikrârlarını el-mukarru lehü’l-mezbûr Mihal bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri şehri Rebî‘ilevvel li sene isneyn ve hamsîn ve elf.
Şuhûdü’l-hâl: Mahmud Çelebi b. Mehmed es-Serrâc, Ahmed Ağa b. Abdullah, Mehmed Çelebi b. Mustafa el-İmâm, Ahmed Çelebi b. Muslu, Mehmed Çelebi b. Ahmed, Mustafa Halîfe b. Surûrî el-İmâm, Mehmed Halîfe b. İbrahim el-Müezzin, Mehmed Bey b. Mustafa serbölük, Ömer Beşe b. Mustafa er-Râcil ve gayruhüm Hasköy diye meşhûr bu mahkeme-i şerîfeye el-fakīr ilallâhi’l-ganiyyi’l-kadîr Mustafa’nın cülûsu a‘lemü’l-ulemâ’i’l-kirâm efdalü’l-fuzalâ’i’l-fihâm Fenârîzâde diye şöhret bulan Hazret-i Şeyhî Mehmed Efendi -cu‘ıle’t-tekā zâdehû ve nâle murâdehû- zamânında vâki‘ oldu. Vaka‘a’t-tahrîr fî gurreti Rebî‘ılâhir li sene isneyn ve hamsîn ve elf. Yâ fettâh, yâ rezzâk, yâ ganî, yâ muğnî
|