Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 104 Hüküm no: 58 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Bali’nin gözünü çıkardığını iddia ettiği Süleyman Çelebi’ye açtığı diyet davasında anlaşma sağlanması Efendi hazretleri imzâsıyladır. Hüccet, göz diyetinden sulh ve ibrâ Mahmiye-i İstanbul’da Hocapaşa kurbünde Sahhâf Süleyman mahallesi sâkinelerinden Fâtıma bt. Bali nâm hatun zâtını ma‘rifet-i şer‘iyye ile ârifân olup mahmiye-i mezbûrede Ereğli mahallesi sükkânından Ali Beşe b. Yahya ve el-Hâc Ramazan b. Şa‘bân nâm kimesneler ta‘rîfleri ile mu‘arrefe oldukdan sonra meclis-i şer‘-i şerîfde sâlifü’z-zikr Sahhâf Süleyman mahallesi sükkânından bâ‘isü’l-kitâb Süleyman Çelebi b. Ahmed nâm kimesne mahzarında ikrâr ve takrîr-i kelâm edip târîh-i kitâb senesinde vâki‘ îd-i adhânın dördüncü günü mezbûr Süleyman Çelebi menzillerinin önünde olan sokakda cirid oynar iken ben dahi câr-ı mülâsıkı olan el-Hâc Ali nâm kimesnenin menzilinden sokağa çıkdığımda mezbûr Süleyman Çelebi’nin remy etdiği ciridi hatâen sol gözüme isâbet etmekle gözümü ihrâç edip bi’l-külliye gözüm kör olmağla bundan akdem mezbûr Süleyman Çelebi’den merhem bahâsı olmak üzere vekîlim Mehmed b. Mustafa yedi ile dört bin akçe aldığımdan sonra gözümün diyetini mezbûr Süleyman Çelebi’den da‘vâ etdiğimde mezbûr Süleyman Çelebi vech-i muharrer üzere gözümü [13a] ihrâç etdiğini inkâr etdiğinden mâ‘adâ mezbûr Mehmed’i sulh ve ibrâya vekîl edip ol dahi benim ile bi’l-vekâle meblağ-ı mezbûr dört bin akçe üzerine sulh olup husûs-ı mezbûra müte‘allıka da‘vâdan zimmetimi ibrâ etmiş idi deyü da‘vâyı def‘ edip ben dahi inkâr edip beynimizde nizâ‘-ı küllî vâki‘ olmağla muslihûn tavassut edip mezbûr Süleyman Çelebi ile beynimizde dört bin akçe üzerine inşâ-i akd-i sulh etdiklerinde ben dahi sulh-ı mezbûru kabûl ve bedel-i sulh olan meblağ-ı mezbûr dört bin akçeyi mezbûr Süleyman Çelebi yedinden alıp kabz edip husûs-ı mezbûra müte‘allıka âmme-i da‘vâdan mezbûr Süleyman Çelebi’nin zimmetini ibrâ-i âmm-ı kâtı‘u’n-nizâ‘ ile ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî aşer min-Cemâziyelâhire li-sene ihdâ ve semânîn ve elf. Şuhûdü’l-hâl: Kapıcı Osman Bey b. Abdullah el-mübâşir, Mustafa Çelebi b. el-Hâc Receb, Zülfikar Bey b. Ahmed, Ali Bey b. Mehmed, Mehmed Bey b. Himmet.