|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 368 Hüküm no: 522 Orijinal metin no: [281-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
İbrahim Paşa’nın tasarrufunda olan vakıf kiremit fırınındaki hissesini Pedermâh bt. Abdullah’a devrettiği
Dârü’s-saltanati’s-seniyye Mahmiye-i Kostantıniyye mahallâtından Süleymaniye mahallesi sâkinlerinden olup sâbıkan Kıbrıs beylerbeyisi olan İbrahim Paşa hazretlerinin taraf-ı şerîflerinden husûs-ı âti’z-zikr ikrâra vekîl olup Halil Bey b. Mahmud ve Hüseyin Bey b. Mehmed nâm kimesneler şehâdetleri ile sâbitü’l-vekâle olan fahrü’l-akrân Yusuf Ağa b. Mehmed meclis-i şer‘-i şerîf-i râsihü’l-erkân ve mahfil-i dîn-i münîf-i şâmihü’l-beyânda işbu râfi‘atü’l-vesîka fahrü’l-muhadderât Pedermâh bt. Abdullah nâm hâtunun zevci ve tarafından ikrâr-ı âti’l-beyânı tasdîke vekîli olup mezbûreyi ma‘rifet-i şer‘iyye ile ârifân olan Ali b. Osman ve diğer Ali b. Abdullah nâm kimesneler şehâdetleri ile sâbitü’l-vekâle olan Mustafa Ağa b. Hasan mahzarında bi’l-vekâle ikrâr ve takrîr-i kelâm edip müvekkilim müşârun-ileyh İbrahim Paşa’nın Havâss-ı aliyye muzâfâtından Hasköy’de Pîrî Paşa mahallesinde vâki‘ Hüseyin Paşa Evkāfı’ndan olup bir tarafı Osman Beşe cüdrânı ile ve bir tarafı debbağhâne ile ve bir tarafı deryâ ile ve taraf-ı âhiri tarîk-i âm ile mahdûd ve mümtâz olan bir bâb kiremit fırınından icâre-i mu‘accele ve her ayda yüz on dört akçe icâre-i müeccele ile mutasarrıf olduğu sülüs hisse-i şâyi‘asının hakk-ı tasarrufun mütevellî-i vakf-ı mezbûr izniyle mezbûre Pedermâh Hâtun’a vekâlet-i mahkiyyem hasebiyle tefvîz edip mukābele-i tefvîzde bin beş yüz kıt‘a riyâlî kebîr guruşu ahz u kabz [282] olundu, ba‘de’l-yevm sâlifü’z-zikr fırının sülüs hisse-i şâyi‘ası mezbûre Pedermâh Hâtun’un taht-ı yedinde ve kabza-i tasarrufunda olup keyfemâ yeşâ ve yehtâr mutasarrıf olsun dedikde gıbbe’t-tasdîk kayd şüd. Hurrire fi’l-yevmi’s-sâmin aşer min şehri Rebî‘ılâhir li sene isneyn ve hamsîn ve elf.
Şuhûdü’l-hâl: Mehmed Efendi el-İmâm, Rıdvan Ağa zevvâk-ı hâssa, Osman Çavuş, Hüseyin Çavuş, el-Hâc Karabaş, Dilâver b. Abdullah, Memi b. Hüseyin, Yahya b. İbrahim, Ali el-muhzır ve gayruhüm
|