.:: İstanbul Kadı Sicilleri ::.


Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 368
Hüküm no: 523
Orijinal metin no: [282-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yenabor v. Aleksi’nin Elyakom v. Karakaş’a borcunu ödemesinin tenbih edildiği

Mahmiye-i Kostantıniyye mahallâtından Hoca Paşa mahallesi sâkinlerinden eski İstanbul cemâ‘atinden işbu râfi‘ü’l-vesîka Elyakom v. Karakaş nâm Yahudi mahfil-i kazâda Havâss-ı aliyye tevâbi‘inden Hasköy sâkinlerinden Yenabor v. Aleksi nâm zimmî mahzarında üzerine takrîr-i da‘vâ edip mezbûr Yenabor zimmetinde yüz müdre arak bahâsından beher müdre yüzer akçe[den] on bin akçe ve otuz kantar siyah üzüm bahâsından beher kantar yüz otuz ikişer akçeden üç bin dokuz yüz altmış akçe ve cihet-i karz-ı şer‘îden bin altı yüz akçe ki cem‘an on beş bin beş yüz altmış akçe hakkım vardır taleb eder[im] suâl olunsun dedikde, gıbbe’s-suâl mezbûr Yenabor cevâbında fi’l-vâki‘ merkūm İlyako nâm Yahudinin sâlifü’z-zikr müdre arak bahâsından olan on bin akçedir seksen müdre arak ve meblağ-ı mezbûr üç bin dokuz yüz altmış akçeden üç bin akçe zimmetimde hakkı vardır dedikde mezbûr Yenabor ikrâr-ı mürettebesiyle ilzâm olunup edâsına tenbîh birle kayd şüd. Hurrire fi’t-târihi’l-mezbûr.


Şuhûdü’l-hâl: Abdurrahim Çelebi b. Mehmed Çavuş, Mehmed Beşe b. Mustafa er-Râcil, Ali el-muhzır, Yutan v. İsak