|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 369 Hüküm no: 524 Orijinal metin no: [282-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Başek bt. Azı’nın mülkü olan Eğin’deki bağ hissesinin Mihran’a satıldığı
Vilâyet-i Anadolu’da kasaba-i Eğin sâkinelerinden Başek bt. Azı nâm Nasrâniyye tarafından husûs-ı âti’l-beyânı bey‘a vekîl olup bimâ hüve nehcü’l-mu‘teber şer‘an sâbitü’l-vekâle olan sadrî oğlu Behek nâm zimmî meclis-i şer‘de işbu hâmilü’l-vesîka Mihran nâm zimmî mahzarında bi’l-vekâle ikrâr ve i‘tirâf edip kasaba-i mezbûrede vâki‘ bir tarafı Musa Çelebi mülkü ile ve bir tarafı Murad nâm zimmî mülkü ile ve bir tarafı Marderos nâm zimmî mülkü ile ve taraf-ı âhar Hader nâm zimmî mülkü ile mahdûd olup müvekkilem mezbûrenin babasından intikāl eden bağın beş sehimden bir sehim hisse-i şâyi‘asını vekâletim hasebiyle mezbûr Mihran’a on beş kıt‘a riyâlî kebîr guruşa tarafeynden îcâb [283] ve kabûlü hâvî bey‘-i kat‘î ile bey‘ edip kabz-ı semen ve teslîm-i müsemmen eyledim ba‘de’l-yevm bağ-ı mezbûrdan hisse-i merkūme mezbûr Mihran’ın mülk-i müşterâsıdır keyfemâ yeşâ ve yehtâr mutasarrıf olsun dedikde kayd şüd. [Tahrîren] fi’l-yevmi’s-sâlis ve’l-ışrîn min şehri Rebî‘ılâhir li sene isneyn ve hamsîn ve elf.
Şuhûdü’l-hâl: Kaspar v. Peylek, Ovanez v. Hader, Kiryakor [v.]? Şahîk?, Esfader v. Mercan, Yani [v.] Kiryakor ve gayruhüm
|