|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 372 Hüküm no: 530 Orijinal metin no: [285-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Belkıs bt. Mustafa’nın Yahudihâne odasını Yasef ve Avraham’a kendi mallarıyla tamir etmek üzere icâreteynle kiraladığı
Mahmiye-i Kostantıniyye mahallâtından Meydancık mahallesi sâkinlerinden Yahudi tâ’ifesinden Kalivre cemâ‘atinden işbu râfi‘ayü’l-vesîka Yasef v. Salamon ve Avraham v. Yako nâm Yahudiler meclis-i şer‘de mahmiye-i mezbûre mahallâtından Langa kurbunda Kâtib Kasım mahallesi sâkinelerinden fahrü’l-muhadderât Belkıs bt. Mustafa nâm hâtun mahzarında takrîr-i kelâm eylediler ki mezbûre Belkıs nâm hâtunun Havâss-ı aliyye kazâsı tevâbi‘inden Hasköy nâm kasabada vâki‘ sâhil-i bahr olan mülk Yahudihânesinin odalarından bir bâb harâba müşrif fevkānî odayı kendi mâlımız ile ta‘mîr etmek üzre yevmî ikişer akçe icâre-i müeccele ile istîcâra istîzân eylediğimizde mezbûre Belkıs nâm hâtun vech-i muharrer üzre sâlifü’z-zikr Yahudihânenin odalarından bir bâb harâba müşrif fevkānî odayı yevmî ikişer akçe icâre-i müeccele ile bize îcâr eyleyip ta‘mîrine dahi izin vermişdir, suâl olunup takrîri tahrîr olunmasın taleb ederiz dediklerinde, gıbbe’s-suâl mezbûre Belkıs nâm hâtun cevâb verip fi’l-hakīka mezbûrân Yasef ve Avraham nâm Yahudilere kasaba-i mezbûrede vâki‘ sâhil-i bahr olan [286] mülk Yahudihânemin odalarından bir bâb harâba müşrif fevkānî odayı kendi mâlları ile ta‘mîr etmek üzre yevmî ikişer akçe icâre-i müeccele ile istîcâra istîzân eylediklerinde ben dahi minvâl-i meşrûh üzre mezbûrân Yasef ve Avraham [nâm] Yahudilere îcâr edip ta‘mîrine izin dahi verdim dedikde gıbbe’t-tasdîki’l-mu‘teber mâ vaka‘a ketb olundu. Hurrire fi’l-yevmi’s-sâbi‘ min şehri Cumâdelûlâ li sene isneyn ve hamsîn ve elf.
Şuhûdü’l-hâl: Ömer Ağa b. Abdullah, Abdurrahim Çelebi b. Mehmed, Mustafa b. Yakub, Mustafa b. Abdullah, Ali el-muhzır
|