Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 104 Hüküm no: 59 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun’un eşi Yakub’dan muhâlaa yoluyla boşanması Mahmiye-i İstanbul’da Karabaş mahallesi sâkinelerinden Havva bt. el-Hâc Murad tarafından husûs-ı âti’l-beyâna vekîl olup vekâleti mahalle-i mezbûre sükkânından zâtını ma‘rifet-i şer‘iyye ile ârifân olan Mustafa b. Arslan ve Eyüb b. Mehmed nâm kimesneler şehâdetleri ile şer‘an vekâleti sâbite olan el-Hâc Ahmed b. Receb nâm kimesne meclis-i şer‘-i şerîfde mezbûre Havva’nın zevc-i dâhilün-bihâsı işbu bâ‘isü’l-kitâb Yakub b. Şa‘bân nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Havva zevci mezbûr Yakub zimmetinde mütekarrir ve ma‘kūdün-aleyh olan iki bin beşyüz akçe mehr-i müecceli ve nafaka-i iddet-i mu‘ayyene-i ma‘lûmesi ve eşyâ-i memlûkesinden mezbûr Yakub’a def‘ ü teslîm mezbûr Yakub dahi ahz u kabz etdiği bir zennâne çuka ferâce ve bir mükemmel hamam rahtı ve üç makrama ve bir takye ve bir peçe ve bir peştemâl ve üç gömlek ve iki don ve bir uçkur ve üç zirâ‘ yeşil kutnî üzerlerine ve me’ûnet-i süknâsı dahi kendi üzerine olmak üzere mezbûr Yakub ile hul‘ olup ol dahi hul‘-ı mezbûru kabûl etdikden sonra hukūk-ı zevciyete ve gayra müte‘allıka âmme-i da‘vâdan her biri âharın zimmetini ibrâ-i âmm-ı kâtı‘u’n-nizâ‘ ile ibrâ ve iskāt eylediler dedikde mâ-vaka‘a bi’t-taleb ketb olundu. Fi’l-yevmi’s-sânî min-Cemâziyelâhire li-sene ihdâ ve semânîn ve elf. Şuhûdü’l-hâl: Hasan b. Ahmed el-hatîb, Mehmed Halîfe el-müezzin, Mustafa Çelebi b. el-Hâc Ahmed, Osman Efendi b. Abdulkadir.