.:: İstanbul Kadı Sicilleri ::.


Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 378
Hüküm no: 540
Orijinal metin no: [292-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


İsmihân bt. Hacı Mehmed’in Eflak asıllı kölesini azat ettiği

Havâss-ı aliyye kazâsı tevâbi‘inden kasaba-i Hasköy mahallâtından Turşucu mahallesi sâkinelerinden İsmihân bt. el-Hâc Mehmed nâm hâtun meclis-i şer‘-i hatîr-i lâzımü’t-tevkīrde rıkkına mu‘terif olan işbu râfi‘ü’l-kitâb kısa boylu açık kaşlı kara gözlü sağ ayağı ve sol ayağı mecrûh Eflakiyyü’l-asl Hüseyin b. Abdullah nâm abd-i memlûkü mahzarında takrîr-i kelâm ve ta‘bîr ani’l-merâm edip merkūm Hüseyin’i hasbeten lillâhi’l-azîm ve taleben li merdâti Rabbihi’l-kerîm mâlımdan âzâd eyledim ba‘de’l-yevm sâir ahrâr-ı asliyyîn gibi hür olup üzerinde hakk-ı velâdan gayrı hakkım kalmadı deyû bi’t-tav‘ ve’r-rızâ ikrâr ve i‘tirâf eylediğinde mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmis ve’l-ışrîn min Cumâdelâhir li sene isneteyn ve hamsîn ve elf.


Şuhûdü’l-hâl: Mehmed Efendi b. Mustafa el-İmâm, Mehmed Halîfe b. İbrahim el-Müezzin, Mahmud Çelebi serrâc-ı sultânî, Abdi Bey, Ahmed Çelebi yayıkçı, İbrahim b. Kaya, el-Hâc Nureddin Hasköy diye meşhûr bu mahkeme-i şerîfeye el-fakīr ilallâhi’l-kadîr es-Seyyid Veli el-hakīrin cülûsu a‘lemü’l-ulemâ’i’l-izâm efdalü’l-fuzalâ’i’l-fihâm Fenârîzâde diye şöhret bulan Hazret-i Şeyhî Mehmed Efendi zamânında vâki‘ oldu. Vaka‘a’t-tahrîr fî gurreti şehri Recebi’l-mürecceb li sene isneyn ve hamsîn ve elf mine’l-hicreti’n-nebeviyye. Yâ fettâh, yâ fettâh, yâ rezzâk, yâ rezzâk