|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 379 Hüküm no: 541 Orijinal metin no: [292-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kel Onnes v. Bahtek’in evini Bogos’a vefâen sattığı
Vilâyet-i Anadolu’da Arapgir sancağında tâbi‘ kasaba-i Eğin mahallâtından Emirhayr mahallesi ahâlîsinden Kel Onnes v. Bahtek nâm Ermeni mahfil-i kazâda işbu bâ‘isü’l-kitâb Bogos v. Canım muvâcehesinde bi-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafı Aznavur mülkü ve bir tarafı Kehator mülkü ve bir tarafı Hobyar mülkü ve bir tarafı Cano nâm Ermeniler mülkleri ile mahdûd ve mümtâz olan mülk evimi tarafeynden îcâb ve kabûlü hâvî bey‘-i bât ile altmış kebîr riyâlî guruşa bey‘ edip ol dahi vech-i muharrer üzre [293] iştirâ edip semen-i mezbûru bana teslîm eyledikden sonra târih-i kitâbdan bir sene tamâmında müşterî-i mezbûr ben semeni mezbûru teslîm edeyim, mebî‘-i mezbûr benim mülküme avd etmeye beynimizde akd-i lâzımü’l-vefâ olmuşdur dedikde mukırr-ı mezbûru ikrâr-ı meşrûhunda mezbûr Boğos bi’l-muvâcehe tasdîk ettikden sonra hâkim-i muvakki‘-i sadr-ı kitâb Hüseyin, bey‘de vefâ zikr olunacak bey‘ câ’iz ve vefâ lâzımdır ve ben e’imme-i müctehidîn mezhebleri üzre şâibe-i rehniyet bertaraf oldukdan sonra akdeyn-i mezbûreynin sıhhatine hüküm birle mâ hüve’l-vâki‘ ketb olundu. Tahrîren fî gurreti Recebi’l-ferd li sene isneyn ve hamsîn ba‘de’l-elf mine’l-hicreti’n-nebeviyye aleyhi efdalü’t-tahiyye.
Şuhûdü’l-hâl: Boğos v. Kerfi, Sehak v. Şehad, Agop v. Hasib, Sarı Agop v. Murad, Anco v. Haraz
|