Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 105 Hüküm no: 60 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa Çelebi’nin varisi Fatıma’nın Hasan Bey aleyhindeki alacak iddiasından men olunması Efendi hazretleri imzâsıyladır. Mahmiye-i İstanbul’da Dülbendçi Hüsam mahallesi ahâlîsinden olup bundan akdem merhûm Ekmekçibaşı Mustafa Ağa Vakfı’na mütevellî iken vilâyet-i Rumili’de medîne-i Yenişehir’de vefât eden Mustafa Çelebi b. Sinan veresesi zevce-i metrûkesi ( ) nâm hatun ile li-ebeveyn kız karındaşı Fâtıma nâm hatuna münhasıra olduğu şer‘an sâbit oldukdan sonra mezbûre Fâtıma Hatun meclis-i şer‘-i şerîfde merhûm-ı mezbûr Ekmekçibaşı Mustafa Ağa’nın vakfına bi’l-fi‘il mütevellî olan bâ‘isü’l-kitâb Hasan Bey b. Ahmed nâm kimesne mahzarında üzerine da‘vâ ve takrîr-i kelâm edip mezbûr Hasan Bey müteveffâ-yı mezbûrun terekesinden üç yüz riyâlî guruşu bi-gayr-ı hakkın ahz etmişdir suâl olunup meblağ-ı mezbûrdan benim hissem olan iki yüz beş riyâlî guruşun mezbûr Hasan Bey’den alıverilmesi matlûbumdur dedikde gıbbe’s-suâl mezbûr Hasan Bey cevâbında vakf-ı mezbûrun müteveffâ-yı mezbûrdan mukaddem mütevellîsi olan Receb Bey azlolunup yerine müteveffâ-yı mezbûr Mustafa Çelebi mütevellî oldukda mezbûr Receb Bey asl-ı mâl-ı vakf-ı mezbûrdan yedinde olan üç yüz riyâlî guruşu müteveffâ-yı mezbûr Mustafa Çelebi’ye hayâtında teslîm, mezbûr Mustafa Çelebi dahi ahz u kabz etdiğinden sonra mücehhelen vefât edip zimmetine deyn olmağla ben dahi meblağ-ı mezbûr üç yüz riyâlî guruşu terekesinden vakıf için ahz u kabz etmiş idim deyü def‘ ile mukābele edicek gıbbe’s-suâl ve’l-inkâr mütevellî-i mezbûr Hasan Bey’den def‘-i mezbûrunu mübeyyine beyyine taleb olundukda mahmiye-i mezbûrede Ahırkapı kurbünde Kabasakal Sinan Ağa mahallesi ahâlîsinden İsmail kethüdâ b. Ömer ve Kapıağası mahallesi ahâlîsinden İbrahim Bey b. Mehmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka vakf-ı mezbûrun mütevellîsi olan mezbûr Receb Bey azlolunup yerine müteveffâ-yı mezbûr Mustafa Çelebi mütevellî oldukda mezbûr Receb Bey asıl mâl-ı vakf-ı mezbûrdan yedinde olan üç yüz riyâlî guruşu mütevellî-yi mezbûr Mustafa Çelebi’ye teslîm, mezbûr Mustafa Çelebi [13b] dahi ahz u kabz etmiş idi. Mezbûr Mustafa Çelebi meblağ-ı mezbûru mücehhelen vefât etmekle terekesinden edâ lâzımdır, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘îye-i mezbûre vech-i mübeyyen üzere mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’l-hâdî aşer min-Cemâziyelâhire li-sene ihdâ ve semânîn ve elf. Şuhûdü’l-hâl: el-Hâc Şa‘bân b. Abdi, Abdullah Çavuş b. Ali, Ömer b. Ali, Ivaz b. Ömer, Şükrullah Bey b. Mustafa.