Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 381 Hüküm no: 545 Orijinal metin no: [295-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Durmuş’un zevci Hüseyin b. Hasan’dan muhâlaa ile boşandığı Hazret-i Havâss-ı aliyye tevâbi‘inden Hasköy mahallâtından Ahmed Çelebi mahallesinde sâkine Âişe bt. Durmuş nâm hâtun tağyîr ve tahrîfden korunmuş olan meclis-i şer‘-i şerîf ve mahfil-i dîn-i münîfde hâmil-i hâze’l-kitâb zevci Hüseyin b. Hasan ile muhâla‘a oldukda ol dahi onunla nikâhlarında ma‘kūdun aleyh olan mikdârı ve nisâbı râyic fi’l-vakt iki yüz akçe olan mehr-i müecceli ve aralarında ilm-i şer‘î ile ma‘lûme ve mukaddere olan nafaka-i iddeti mukābilinde muhâla‘a-i sahîha-i şer‘iyye oldukda akd-i cedîd ve sadâk-ı müste’nef olmaksızın kendisine helâl olmayacak şekilde bâyin olmuş oldukdan sonra her biri âharın zimmetini cemî‘ de‘âvî ve husûmâtdan umûmen ve husûsan hukūk-ı zevciyyete müte‘allik de‘âvîden ibrâ-i âmm-ı kātı‘ü’n-nizâ‘ ve râfi‘ün li mâddeti’ş-şikāk ile ibrâ ettiler. Cerâ zâlike ve hurrire fi’l-yevmi’s-sânî ve’l-ışrîn min şehri Recebi’l-ferd li sene isneyn ve hamsîn ba‘de’l-elf. Şuhûdü’l-hâl: Ahmed Efendi el-İmâm, Mehmed Halîfe el-Müezzin, İbrahim b. Kaya, Süleyman b. Mehmed, Ali Beşe b. Abdullah, Musa b. Mehmed, Hızır b. Turan, Abdülkādir b. Hasan, Sefer b. Hasan, Ali b. Abdullah el-muhzır