Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 381 Hüküm no: 546 Orijinal metin no: [295-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihal v. Manol’un mülk bağını oğlu Masko’ya sattığı Mahmiye-i Galata muzâfâtından Beyoğlu Sarayı mahallesi sâkinlerinden Mihal v. Manol nâm zimmî meclis-i şer‘-i hatîr-i lâzımü’t-tevkīrde işbu bâ‘isü’l-kitâb oğlu Masko v. Mihal muvâcehesinde bi’t-tav‘i’s-sâf ikrâr ve i‘tirâf edip Mahmiye-i Galata bağları sınırı dâhilinde vâki‘ olup Papa Preşkovi demek ile ma‘rûf mevzi‘de bir tarafı Arabacı Yani bağı ve bir tarafı Palas v. Yorgi bağı ve bir tarafı terzi Murad bağı ve bir tarafı tarîk-i âm ile mahdûd ve mümtâz olan tahmînen on dönüm mikdârı mülk bağımı oğlum mezbûr Masko’ya dört bin akçe nakd-i râyic fi’l-vakt akçeye bey‘-i bâtt-ı kat‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim [296] ba‘de’l-yevm mezkûr Masko’nun mülk-i müşterâsı olup keyfemâ yeşâ ve yehtâr mutasarrıf olsun dedikde, mukırr-ı mezbûrun vech-i meşrûh [üzre] cârî olan ikrârını el-mukarru lehü’l-mezbûr Masko vicâhen ve şifâhen kabûl ve tasdîk edicek mâ hüve’l-vâki‘ alâ vukū‘ihî bi[‘t]-taleb ketb ü tahrîr olunup yed-i tâlibe vaz‘ olundu. Tahrîren fî evâhiri şehri Recebi’l-ferd min şuhûri sene isneyn ve hamsîn ve elf. Şuhûdü’l-hâl: Mustafa Çelebi b. Ali el-Müezzin, Mehmed Bey b. Habîb el-bevvâbü’s-sultânî, Murad Bey b. Abdullah, Ahmed Halîfe b. ( ), Şaban b. ( ) en-neccâr, Mehmed b. ( ) en-neccâr, Mehmed b. Mustafa, Ali b. Abdullah el-muhzır ve gayruhüm