Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 383 Hüküm no: 549 Orijinal metin no: [297-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Abdullah’ın evini Abdi Bey b. Şaban’a sattığı Mahmiye-i İstanbul’da Nene Hâtun mahallesi sâkinelerinden Âişe bt. Abdullah nâm hâtun meclis-i şer‘-i şerîfde hâssa serrâclarından râfi‘ü’l-kitâb Abdi Bey b. Şaban mahzarında bi’t-tav‘ ikrâr ve takrîr-i kelâm edip Havâss-ı Kostantıniyye’ye tâbi‘ kasaba-i Hasköy mahallâtından Ahmed Çelebi mahallesinde vâki‘ bir tarafı İbrahim Paşa mülkü ve bir tarafı ba‘zan Mehmed Efendi ve ba‘zan Ali Beşe ve ba‘zan Ali Halîfe mülkleri ve bir tarafı tarîk-i hâs ve bir tarafı tarîk-i âm ile mahdûd iki bâb fevkānî ve iki bâb tahtânî beytleri ve bir sofa ve bir ahırı ve bir kenîfi ve bir su kuyusunu ve hadîka-i zât-ı eşcâr-ı müsmire ve gayr-ı müsmireyi ve bir dönüm bağı müştemil mülk menzilimi cümle tevâbi‘ ve levâhıkı ile mezbûr Abdi Bey’e fıddî râyicü’l-vakt elli bin akçeye bey‘-i bâtt-ı sahîh-i şer‘î ile bey‘ ve teslîm ol dahi vech-i meşrûh üzre iştirâ ve kabûl ettikden sonra semen-i [298] mezbûr elli bin akçeyi müşterî-i mezbûr yedinden tamâmen ahz u kabz eyledim, ba‘de’l-yevm menzil-i mahdûd-ı mezkûr mezbûr Abdi Bey’in mülk-i müşterâsıdır dedikde mukırra-i mezbûre Âişe’nin ikrârını müşterî-i mezbûr vicâhen tasdîk ve şifâhen tahkīk edicek mâ vaka‘a bi’t-taleb ketb olundu. Hurrire fî evâhiri şehri Şa‘bâni’l-mu‘azzam li sene isneyn ve hamsîn ve elf. Şuhûdü’l-hâl: Ahmed Efendi el-İmâm, Mehmed b. Mustafa, Ahmed Ağa b. Abdurrahman, Mahmud Çelebi b. Mehmed serrâc, Mustafa b. Halil, Mehmed Efendi el-İmâm, Ahmed Çelebi b. Muslu, Kadri b. Hasan, Hüseyin b. Mehmed, Ali Çelebi b. Hüseyin, Ali b. Ahmed, Hüseyin b. Ahmed