Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 384 Hüküm no: 550 Orijinal metin no: [298-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Çavuş ile bazı kadınların bir evde içki aleminde yakalandıkları Havâss-ı aliyye kazâsına tâbi‘ Hasköy zâbiti olan Mustafa Bey b. Abdullah meclis-i şer‘-i hatîr-i lâzımü’t-tevkīrde işbu bâ‘isü’l-kitâb İbrahim Çavuş ve Sâime bt. Abdi ve Ümmühânî bt. Sinan muvâcehelerinde takrîr-i da‘vâ ve bast-ı kelâm edip mezbûrûn İbrahim Çavuş ve Sâime ve Ümmühânî Turşucu mahallesinde sâkine Mehmed b. Abdullah nâm kimesnenin evinde şürb-i hamr eder iken mahalle-i mezbûreden Usta Hasan ve birkaç hâtunlar merkūm Mehmed’in evinden ihrâc eylemişler, kapısı önünde mezbûr İbrahim Çavuş ve avratları, Ömer Reis ile ma‘an ahz eyledim, hâlen merkūm Mehmed’den dahi suâl olunup cevâbı tahrîr olunmak matlûbumdur dedikde, gıbbe’s-suâl cevâbında fi’l-vâki‘ merkūm İbrahim Çavuş benim ile bu bir vilâyet âdemi olup işbu hâzıratün fi’l-meclis olan iki avrat ile ma‘an bana müsâferet için geldiler deyû ikrâr ve i‘tirâf eylediğinden sonra mahalle-i mezbûreden olup Muslu nâm kimesne dahi meclis-i şer‘a hâzır olup fi’l-vâki‘ mezkûr Mehmed’in evinde Sâime ve Çavuş ve Ümmühânî şarâb testisi ile Usta Hasan ve mahalleden birkaç hâtunlar ihrâc eylediler deyû alâ tarîki’l-ihbâr şehâdet eylediğinden sonra mezbûre Sâime’nin ağzında râyiha-i hamr mevcûdmudur deyû Mehmed b. İbrahim el-Müezzin istişmâm eylediğinde fi’l-vâki‘ mevcûddur deyû alâ tarîki’l-ihbâr şehâdet edicek kayd-ı sicil olundu. Hurrire fî evâhiri şehri Şa‘bân li sene isneyn ve hamsîn ve elf. Şuhûdü’l-hâl: Ali Halîfe b. Mehmed el-İmâm, Mustafa b. Seydi, Hasan Bey b. Mehmed, İbrahim b. Hüsrev, Abdünnebi b. Abdullah, Mehmed Bey b. Mustafa Yâ ..?, yâ Rezzâk, yâ Allah Hasköy diye meşhûr bu mahkeme-i şerîfeye el-fakīr ilallâhi’l-ganiyyi’l-kadîr Mehmed’in cülûsu a‘lemü’l-ulemâ’i’l-izâm Fenârîzâde diye şöhret bulan Şeyh Mehmed Efendi zamânında vâki‘ oldu. Kad vaka‘a’t-tahrîr fî gurreti Ramazâni’l-mübârek li sene isneyn ve hamsîn ve elf. Yâ Fettâh, yâ Rezzâk, yâ Ganî, yâ Muğnî Hasköy diye meşhûr bu mahkeme-i şerîfeye el-fakīr ilallâhi’l-ganiyyi’l-kadîr Mehmed b. Mahmud’un cülûsu a‘lemü’l-ulemâ’i’l-izâm Fenârîzâde diye şöhret bulan Şeyh Mehmed Efendi zamânında vâki‘ oldu. Kad vaka‘a’t-tahrîr fi’l-yevmi’r-râbi‘ min Şevvâli’l-mükerrem li sene isneteyn ve hamsîn ve elf.