Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 385 Hüküm no: 551 Orijinal metin no: [299-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Durmuş b. Mehmed’in Ali b. Murad tarafından bıçakla yaralandığı ve dava sonunda bedel karşılığı sulh oldukları Kasaba-i Kasımpaşa mahallâtından Küçük Piyâle Paşa mahallesinde sâkin Durmuş b. Mehmed nâm kimesne tarafından vech-i âtî üzre sulh ve ibrâya vekîl olup kasaba-i mezbûre mahallâtından Kulaksız mahallesi sükkânından Mehmed b. Mustafa ve Mehmed b. Hızır nâm kimesneler şehâdetleri ile şer‘an vekâleti sâbite olan Ahmed Çelebi b. Mustafa nâm kimesne mahfil-i kazâda Havâss-ı aliyye kazâsına tâbi‘ Hasköy mahallâtından Kızıl Mescid mahallesinde sâkin Ali b. Murad nâm kimesne mahzarında bi’l-vekâle ikrâr ve takrîr-i kelâm edip târih-i kitâbdan on iki gün mukaddem mezbûr Ali müvekkilim mezbûr Durmuş’un sol uyluğunu bıçak ile urup mecrûh etmeğin müvekkilim mezbûr Durmuş mezbûr Ali’den da‘vâ sadedinde iken mâ beyinlerinde muslihûn tavassut edip zikr olunan da‘vâdan müvekkilim mezbûru beş yüz fıddî râyicü’l-vakt akçe üzerine akd-i sulh eylediklerinde ol dahi sulh-ı mezbûru kabûl ve bedel-i sulh olan meblağ-ı mezbûr beş yüz akçeyi mezbûr Ali’nin yedinden bi’t-tamâm alıp kabz edip husûs-ı mezbûra müte‘allik da‘vâdan mezbûr Ali’nin zimmetini ibrâ-i âmm-ı kātı‘ü’n-nizâ‘la ibrâ eyledi, benden bizzat veya bi’l-vâsıta da‘vâ sudûr ederse lede’l-hükkâmi’l-kirâm mesmû‘a ve makbûle olmasın dedi dedikde vekîl-i mezbûr Ahmed Çelebi’nin ikrârını mezbûr Ali vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ aşer min Şevvâli’l-mükerrem [li] sene isneteyn ve hamsîn ve elf. Şuhûdü’l-hâl: Ebûbekir Çelebi b. Ömer, es-Seyyid İsmail b. İbrahim, Hasan Çelebi b. Şükrullah, Mehmed b. Abdi ve gayruhüm