Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 106 Hüküm no: 61 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman’a eşya bedelinden olan borcunu ödemesi hususunda Ali’ye tenbih olunması Hüccet, ikrârlarıyla meblağ-ı bâc edâya tenbîh Tüccâr tâifesinden el-Hâc Süleyman b. el-Hâc Ebu Medyen? nâm kimesne meclis-i şer‘-i şerîfde el-Hâc Ali b. Şeyh Şâ‘ir nâm kimesne mahzarında üzerine da‘vâ ve takrîr-i kelâm edip bundan akdem mezbûr el-Hâc Ali’ye iki yüz peştemâli kırk esedî guruşa ve altmış bogasimi ikiyüz esedî guruşa safka-i vâhide ile bey‘ ve teslîm, ol dahi iştirâ ve tesellüm etdiğinden sonra meblağ-ı mezbûrun on dört esedî guruşunu bana edâ edip ikiyüz yirmi altı kıt‘a esedî guruşu zimmetinde bâkī kalmağla meblağ-ı bâkī-i mezbûr iki yüz yirmi altı kıt‘a esedî guruşun mezbûr el-Hâc Ali’den suâl olunup alıverilmesi matlûbumdur dedikde, gıbbe’s-suâl mezbûr el-Hâc Ali cevâbında müdde‘î-i mezbûra vech-i muharrer üzere ciheteyn-i mezbûreteynden zimmetinde vâcibü’l-edâ ve lâzımü’l-kazâ iki yüz yirmi altı kıt‘a esedî guruş deyni olduğunu bi-tav‘ihî ikrâr u i‘tirâf etmeğin mûcebince meblağ-ı bâkī-i mezbûr iki yüz yirmi altı kıt‘a esedî guruşu müdde‘î-i mezbûra edâ ve teslîme merkūm el-Hâc Ali’ye tenbîh olunduğu mâ-vaka‘a bi’t-taleb ketb olundu. Fi’l-yevmi’l-hâmis aşer min-Cumâdelâhire li-sene ihdâ ve semânîn ve elf. Şuhûdü’l-hâl: İbrahim Çelebi b. Ahmed, Mehmed b. Ramazan, Veli b. Mahmud, Şükrullah Bey b. Mustafa.