Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 107 Hüküm no: 62 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamza’nın vefat eden kardeşi Mehmed Beşe’nin alacağından dolayı açtığı davada anlaşma sağlanması Dergâh-ı âlî yeniçerilerinden Ellialtıncı Bölük’e mahsûs odada odabaşı iken bundan akdem cezîre-i Girid’de vefât eden Mehdi demekle ma‘rûf Mehmed Beşe b. İskender’in li-ebeveyn karındaşı ve hasren vârisi olan el-Hâc Hamza nâm kimesne meclis-i şer‘-i şerîfde bâ‘isü hâze’l-kitâb Süleyman Beşe b. Mustafa nâm kimesne mahzarında ikrâr ve takrîr-i kelâm edip müteveffâ-yı mezbûrun mezbûr Süleyman Beşe zimmetinde cihet-i karzdan bin üç yüz elli esedî guruş ve bogasi ve kutnî bahâlarından iki yüz elli esedî guruş min-haysü’l-mecmû‘ bin altı yüz esedî guruş hakkı olup hattâ mezbûr Süleyman Beşe ikrâr dahi etmekle meblağ-ı mezbûr bin altı yüz esedî guruşu bundan akdem huzûr-ı hâkimü’ş-şer‘de mezbûr Süleyman Beşe’den taleb etdiğimde mezbûr Süleyman Beşe deyn ve makbûzum ancak yedi yüz esedî guruş ile beş bin sümün iken beş yüz guruş ribh verecek olup ve beş bin sümün beş yüz guruş olmak üzere bin altı yüz esedî guruş deynim vardır, ikrâr dahi etmiş idim deyüp beynimizde nizâ‘-ı küllî vâki‘ olduğundan sonra muslihûn tavassut edip mezbûr Süleyman Beşe ile beynimizde bin elli esedî guruş üzerine inşâ-i akd-i sulh etdiklerinde ben dahi sulh-ı mezbûru kabûl ve bedel-i sulh olan meblağ-ı mezbûr bin elli esedî guruşu işbu meclis-i şer‘de mezbûr Süleyman Beşe yedinden tamâmen ahz u kabz edip husûs-ı mezbûra müte‘allıka âmme-i da‘vâdan ben mezbûr Süleyman Beşe’nin zimmetini ve mezbûr Süleyman Beşe dahi benim zimmetimi ibrâ-i âm ile ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî aşer min-Cumâdelâhire li-sene ihdâ ve semânîn ve elf. Şuhûdü’l-hâl: Haydar Beşe ser-oda 44. C[emâ‘at], Muharrem Beşe ser-oda 39. C[emâ‘at], Hacı Halil Beşe ser-oda 39. C[emâ‘at], Hacı Osman, Halil b. Abdurrahman.