Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 391 Hüküm no: 564 Orijinal metin no: [304-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Hüdâverdi ile Hüseyin b. Hasan’ın muhâlaa ile boşandıkları Havâss-ı aliyye kazâsına tâbi‘ Hasköy’de vâki‘ Ahmed Çelebi mahallesinde sâkinelerinden Âişe bt. Hüdâverdi nâm hâtun meclis-i şer‘-i şerîfde işbu râfi‘ü’l-vesîka zevci Hüseyin b. Hasan nâm kimesne mahzarında ikrâr-ı tav‘î edip zevcim mezbûr Hüseyin ile beş yüz akçe mehr-i müeccellimden ve nafaka-i iddetimden ve sâir zevciyyete müte‘allik olan da‘vâ ve mutâlebât ve münâza‘ât ve muhâsamâtdan fâriğa olmak üzre [muhâla‘a] eyleyip min ba‘d ol benden ve ben andan kat‘-ı alâka ve terk-i nizâ‘ eyledik dediğinde mezbûr Hüseyin dahi vech-i meşrûh üzre ben dahi hul‘ eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fî evâhiri Zilhicce-i şerîfe li sene isneyn ve hamsîn ve elf. Şuhûdü’l-hâl: Mehmed b. Sefer, Hızır b. Ulak, Yahya b. İbrahim, Sefer b. Hasan, Şaban b. Hızır, Sinan b. Fazlı ve gayruhüm mine’l-hâzırîn