Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 391 Hüküm no: 565 Orijinal metin no: [304-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meyhâneci Todori’nin alacak davasında sulh olduğu Havâss-ı aliyye kazâsına tâbi‘ Hasköy sükkânından meyhânecilerden Todori v. Yuri nâm zimmî meclis-i şer‘-i hatîr-i lâzımü’t-tevkīrde işbu bâ‘isü’l-kitâb İşbilot v. Yor nâm zimmî muvâcehesinde bi’t-tav‘i’s-sâf ikrâr ve takrîr-i kelâm edip mezbûr İşbilot’da hamr akçesinden üç bin akçe hakkım olup da‘vâ ve taleb ederin dedikde, gıbbe’s-suâl mezbûr İşbilot inkâr ile cevâb verip beynimizde münâza‘ât-ı kesîre vâkı‘a olmuşdu el-hâletü hâzihî beynimize muslihûn tavassut edip altı yüz akçeye inkârdan sulh eylediklerinde biz dahi sulh-ı mezbûru kabûl ve bedel-i sulh olan altı yüz akçeyi mezkûr Todori yedinden bi’t-tamâm ve’l-kemâl ahz u kabz eyleyip husûs-ı mezbûra müte‘allik cemî‘ de‘âvî-yi mutâlebâtdan berî oldum dedikde mukırr-ı merkūmun ikrâr-ı meşrûhunu el-mukarru lehü’l-mezbûr İşbilot bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri Zilhicce-i şerîfe li sene isneyn ve hamsîn ve elf. Şuhûdü’l-hâl: Mehmed Çavuş b. Abdullah el-Mübâşir, Kadir b. Ulak, Mustafa b. Seydi Ahmed, Danyas v. Mihal, Kurd v. Dere