Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 107 Hüküm no: 63 Orijinal metin no: [13b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mülayim Hatun’un menzilini vefat eden kızı Havva’nın çocuklarına satması Mahmiye-i İstanbul’da Mimârsinan mahallesinde sâkine Mülayim bt. Abdullah nâm hatun tarafından husûs-ı âti’l-beyâna vekîl olup vekâleti zâtını ma‘rifet-i şer‘iyye ile ârifân Müezzin Hüseyin Halîfe b. Ahmed ve İsmail Çelebi b. Ali nâm kimesneler şehâdetleri ile şer‘an sâbite olan Mehmed Efendi b. Abdurrahman nâm kimesne meclis-i şer‘-i şerîfde müvekkile-i mezbûrenin müteveffât kızı Havva’nın sadrî sagīr oğulları Ahmed ve İbrahim ve Abdullah’ın babaları ve velîleri olan el-Hâc Abdi Ağa b. Ali ile müteveffât-ı mezbûrenin sadrî kebîr oğlu Mehmed Çelebi mahzarlarında bi’l-vekâle ikrâr ve takrîr-i kelâm edip müvekkilem mezbûre Mülayim akd-i âtî sudûruna değin yedinde mülkü ve hakkı olup mahalle-i mezbûrede vâki‘ bir tarafdan el-Hâc Alimeoğlu Mehmed Beşe Vakfı ve bir tarafdan Kürkçübaşı? Receb Ağa Vakfı ve bir tarafdan mahalle-i mezbûrede Müezzin olanlara meşrûta vakıf menzil ve bir tarafdan tarîk-i [14a] hâs ile mahdûd tahtânî iki bâb oda ve iki sofa ve bir kilâr ve bir su kuyusu ve bir kenîf ve bahçeyi müştemil menzilin dört sehmden bir sehm-i şâyi‘ini mezbûr Mehmed Çelebi’ye beş bin akçeye ve üç sehm-i şâyi‘ini mezbûr el-Hâc Abdi Ağa’ya on beş bin akçeye bey‘ ve teslîm, mezbûr Mehmed Çelebi dahi bi’l-asâle ve mezbûr el-Hâc Abdi Ağa dahi sıgār-ı mezbûrûn Ahmed ve İbrahim ve Abdullah için bi’l-velâye iştirâ ve tesellüm etdiklerinden sonra semen-i mezbûr beş bin akçeyi mezbûr Mehmed Çelebi’ye ve on beş bin akçeyi sıgār-ı mezbûrûna hîbe, mezbûr Mehmed Çelebi dahi bi’l-asâle ve mezbûr el-Hâc Abdi Ağa dahi bi’l-velâye kabûl eylediler. Min-ba‘d menzil-i mahdûd-ı mezbûrun dört sehmden bir sehmi mezbûr Mehmed Çelebi’nin ve birer sehmi sıgār-ı mezbûrûn Ahmed ve İbrahim ve Abdullah’ın mülk-i müşterâlarıdır, keyfe mâ yeşâ‘ûn ve yahtârûn mutasarrıfûn olsunlar dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî aşer min-Cumâdelâhire li-sene ihdâ ve semânîn ve elf. Şuhûdü’l-hâl: el-Hâc Mehmed b. Hüseyin, Mehmed Efendi b. Ali el-imâm, el-Hâc Nuh b. Abdullah, Ömer Beşe b. Mehmed, Ali Beşe b. Abdullah, Şükrullah Bey b. Mustafa.