Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 396 Hüküm no: 574 Orijinal metin no: [308-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi’nin vefat eden anne bir kardeşinden intikal eden miras hissesini vasîsi Hüsrev Bey’den aldığı Hazret-i Ebâ Eyyûb el-Ensârî -aleyhi rahmetü’l-Bârî- kazâsına tâbi‘ Hasköy’de Turşucu Hüseyin Çelebi mahallesinde sâkin Ali Çelebi b. Çakır Memi nâm kimesne meclis-i şer‘-i şerîfde hâzır olup mahalle-i mezbûrede bundan akdem Mehmed b. Mahmud vefât edip erzâkı? li üm er karındaşım Safer oğlu Osman’a intikāl edip ve mezbûr Osman dahi vefât etmeğin erzâkına vasîyy-i şer‘îsi olan Hüsrev Bey b. Abdullah nâm mahzarında takrîr-i kelâm edip müteveffâ-yı mezbûr Osman’dan bana irs-i şer‘le intikāl eden hissemi vasîyy-i mezbûr Hüsrev Bey yedinden bi’t-tamâm ve’l-kemâl alıp kabz ettim, mezbûr Hüsrev Bey zimmetinde bir akçe ve bir habbe hakkım kalmadı, husûs-ı mezbûra müte‘allik da‘vâ ve nizâ‘ edersem inde’l-hükkâmi’l-kirâm mesmû‘ ve makbûl olmasın dedikde mukırr-ı mezbûrun vech-i meşrûh üzre olan ikrârını mukarrun lehü’l-mesfûr Hüsrev Bey b. Abdullah vicâhen tasdîk ve şifâhen tahkīk ettikden sonra bu [ve]sîka-i enîka alâ mâ hüve’l-hakīka ketb olunup yed-i tâlibe vaz‘ olundu. Tahrîren fî evâili Zilhicceti’ş-şerîfe sene ihdâ ve ışrîn ve elf. Şuhûdü’l-hâl: Kerim Efendi el-müsta‘id, Kasım b. Ali el-Müezzin, Mehmed b. Memi er-Reis, Mahmud Hoca el-İmâm, Musa Bey el-Cündî, Muzaffer Bey, Mehmed b. Abdullah korucu, İbrahim b. Bâli el-İmâm, Hızır Efendi el-müsta‘id, Mehmed b. Haydar?, Ferhad b. Abdullah, Hüseyin b. Hasan er-Râcil, Piyâle Bey el-Cündî