Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 109 Hüküm no: 65 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Çelebi’nin kaybolan ve Mustafa b. İbrahim’in elinde bulunan beygirinin kendisine teslim olunması Da‘vâ-yı gasb Mahmiye-i İstanbul’da Hoca Hayreddin mahallesinde sâkin işbu râfi‘ü’l-kitâb el-Hâc Hüseyin Çelebi b. Mustafa nâm kimesne meclis-i şer‘-i şerîfde Mustafa b. İbrahim nâm kimesne mahzarında üzerine da‘vâ ve takrîr-i kelâm edip mezbûr Mustafa’nın mülkü olmak üzere yedinde olan işbu gevgeç kulaklı sol ayağı sekîlü’l-iğdiç bargir mülküm ve hakkım olup târîh-i kitâbdan yirmi gün mukaddem Atpazarı’nda semerci dükkânı önünde merbût iken gāib olmuş idi, suâl olunup zikr olunan bargirin mezbûr Mustafa’dan alıverilmesi matlûbumdur dedikde, gıbbe’s-suâl mezbûr Mustafa cevâbında zikr olunan bargiri bundan akdem medîne-i Edirne’de Atpazarı’nda Hasan nâm canbazdan altı esedî guruşa iştirâ etmekle mülk-i müşterâm olmağın vaz‘-ı yed ederim, müdde‘î-i mezbûr el-Hâc Hüseyin Çelebi’nin vech-i muharrer üzere mülkü olduğu ma‘lûmum değildir deyicek müdde‘î-i mezbûrdan da‘vâsına mutâbıka beyyine taleb olundukda udûl-ı Müslimînden olup mahmiye-i mezbûrede Manisalı Çelebi mahallesi sâkinlerinden Hasan b. el-Hâc Hüseyin ve Ahmed b. Ebubekir ve Haraçcı Muhyiddin mahallesinde sâkin Mustafa b. Hasan nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu gevgeç kulaklı, sol ayağı sekilü’l-iğdiç bargir müdde‘î-i mezbûr el-Hâc Hüseyin Çelebi’nin mülkü ve hakkı olup mellâk tasarrufu gibi tasarruf eder iken mülkünden zâyi‘ olmuşdur. Biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olup zikr olunan bargiri âhara bey‘, ya hîbe ya taraf-ı şer‘iyyeden bir tarîk ile mülkünden ihrâç etmediğine müdde‘î-i mezbûr el-Hâc Hüseyin Çelebi’ye yemîn teklîf olundukda, ol dahi alâ-vefki’l-mesûl yemîn billâhi’l-aliyyi’l-a‘lâ etmeğin mûcebince zikr olunan bargiri müdde‘î-i mezbûr el-Hâc Hüseyin Çelebi’ye teslîme merkūm Mustafa’ya tenbîh olunmağın mâ-vaka‘a bi’t-taleb ketb olundu. Fi’l-yevmi’s-sânî aşer min-Cumâdelâhire li-sene ihdâ ve semânîn ve elf. Şuhûdü’l-hâl: Mustafa Çelebi b. el-Hâc Ahmed, İbrahim Çelebi b. Mehmed, Abdi Çelebi b. Hüseyin, Şükrullah Bey b. Mustafa.