Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 109 Hüküm no: 66 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah b. Mehmed’den intikal eden menzil hisselerinin varislerince satılması Mahmiye-i İstanbul’da Neslişah Sultan mahallesinde sâkin iken bundan akdem vefât eden Abdullah b. Mehmed nâm kimesnenin verâseti vâlidesi Hakime bt. Seydi ve li-ebeveyn kız karındaşı Fâtıma nâm hatunlar ile li-ümmin er karındaşı el-Hâc Mehmed Çelebi b. Hasan nâm kimesneye münhasıra olduğu şer‘an müte‘ayyen oldukdan sonra mezbûr el-Hâc Mehmed asâleten, mezbûretân Hakime ve Fâtıma taraflarınan husûs-ı âti’l-beyâna vekîl olup mezbûretânın zâtlarını ma‘rifet-i şer‘iyye ile ârifân mahalle-i mezbûre sükkânından Mustafa b. Abdullah ve Hasan b. Hüseyin nâm kimesneler şehâdetleri ile şer‘an vekâleti sâbite olan mezbûre Fâtıma’nın zevci olan Şa‘bân Beşe b. Abdullah nâm kimesne meclis-i şer‘-i şerîfde bâ‘isetü’l-kitâb Sehergâh? bt. Abdullah nâm hatun mahzarında ikrâr ve takrîr-i kelâm edip müteveffâ-yı mezbûrun mülkü olup ba‘de vefâtihî irsen bize intikāl etmekle zikr olunan Neslişah Sultan mahallesinde vâki‘ iki tarafdan mûmâ-ileyhâ Neslişah Sultan Vakfı ve bir tarafdan Hüseyin Çelebi mülkü ve bir tarafdan tarîk-i âm ile mahdûd iki bâb tahtânî oda ve bir sofa ve bir kenîf ve bir cüneyneyi müştemil mûrisimizi cümle tevâbi‘ ve levâhıkı ile doksan kıt‘a esedî guruşa bey‘-i kat‘î ile mezbûre Sehergâh Hatun’a asâleten ve vekâleten bey‘ ve teslîm, ol dahi vech-i mübeyyen üzere iştirâ ve tesellüm ve kabûl eyledikden sonra semen [olan] mârrü’z-zikr doksan kıt‘a esedî guruşu mezbûre Sehergâh Hatun yedinden tamâmen ahz u kabz eyledik, ba‘de’l-yevm menzil-i mahdûd-ı mezbûr mülk-i müşterâsıdır, keyfe mâ yeşâ ve yahtâr mutasarrıfe olsun dedikde mâ-vaka‘a bi’t-taleb ketb olundu. Fi’l-yevmi’l-hâmis min-Cumâdelâhire li-sene ihdâ ve semânîn ve elf. Şuhûdü’l-hâl: Mustafa Efendi el-imâm, Mehmed Halîfe el-kayyûm, Şahin Bey b. Abdullah, Mustafa Çelebi b. el-Hâc Ahmed, Hamza b. Abdullah.