Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 110 Hüküm no: 67 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan b. Mehmed’in, Mehmed b. Halil aleyhindeki cariye satışı davası Hüccet-i gabn-ı fâhiş Fi’l-asl vilâyet-i Rumili’de medîne-i Gelibolu’da Debbâğlar mahallesi ahâlîsinden hâlâ mahmiye-i İstanbul’da Karagümrük kurbünde Ali Paşa-i atîk mahallesinde sâkin Ramazan b. Mehmed nâm kimesne meclis-i şer‘-i şerîfde Hacı Mehmed b. Halil nâm kimesne mahzarında üzerine da‘vâ ve takrîr-i kelâm edip hâlâ suğrumda kıbel-i şer‘den mansûbe vasîm olan vâlidem Ümmühani bt. Mehmed nâm hatun elli esedî guruş kıymetli Belkıs bt. Abdullah nâm câriyemi semen-i mislinden noksân-ı fâhiş kırk iki esedî guruşa mezbûr Hacı Mehmed’e bey‘ ü teslîm ve semeninden yirmi esedî guruşun ahz u kabz edip bâkī yirmi iki esedî guruşu zimmetinde kalmış idi, suâl olunup ihkāk-ı hak olunmak matlûbumdur dedikde gıbbe’s-suâl, mezbûr el-Hâc Mehmed cevâbında müdde‘î-i mezbûrun elli esedî guruş kıymetli câriye-i mezbûresin vasiyy-i mezbûre yedinden kırk iki esedî guruşa iştirâ ve tesellüm ve kırk iki esedî guruşu tamâmen vasiyy-i mezbûreye edâ ve teslîm, ol dahi ahz u kabz etmiş idi dedikde, gıbbe’s-suâl ve’l-inkâr mezbûr Hacı Mehmed’den kırk iki esedî guruşu tamâmen vasiyy-i mezbûreye teslîmine beyyine taleb olundukda ityân-ı beyyine için istimhâl etmekle mehl-i şer‘î ile imhâl olundukdan sonra mûcebince ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sâdis min-Cumâdelâhire li-sene ihdâ ve semânîn ve elf. Şuhûdü’l-hâl: Derviş Çavuş b. Mustafa, Süleyman Çelebi b. ( ), İbrahim Çelebi b. ( ), Mehmed b. Ramazan, Mustafa Çelebi b. el-Hâc Ahmed.