Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 41 Hüküm no: 6 Orijinal metin no: [5-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ahmed’in tasarrufundaki evin vakıf değil mülkü olduğunun tespiti Havâss-ı Aliyye kazâsına tâbi‘ kasaba-i Hasköy’de el-Hâc Şaban mahallesi sâkinlerinden Abdülbâkī Efendi b. Ahmed meclis-i şer‘-i şerîfde menzil-i âti’l-beyâna vâzı‘ü’l-yed olduğu şer‘an sâbit ve zâhir olan bâ‘isü’l-kitâb Mehmed b. Ahmed nâm kimesne mahzarında üzerine da‘vâ ve takrîr-i kelâm edip Turşucu mahallesinde vâki‘ bir tarafdan İbrahim Ağa mülkü ve bir tarafdan Al[i]? Ağa mülkü ve bir tarafdan Ali Reis mülkü ve bir tarafdan tarîk-ı âm ile mahdûd olup hâriciyye ve dâhiliyye büyût-ı adîdeyi müştemil menzili ( ) nâm sâhibü’l-hayr süknâsını kendiden sonra sulehâya şart ve ta‘yîn edip hâlâ mezbûr Mehmed bi gayrı hakkın menzil-i mezkûrda sâkin olup zabt ve tasarruf eder suâl olunup takrîri ve menzil-i merkūmdan kasr-ı yedine ba‘de’t-tenbîh menzil-i mezbûrun süknâsı bana tevcîh olunmak matlûbumdur dedikde gıbbe’s-suâl mezbûr Mehmed cevâbında menzil-i mahdûd-ı mezkûr anam İsmihân nâm hâtunun babası Armağan bölükbaşının mülkü olup ba‘de helâkihî sulbiye kızları anam merkūme İsmihân ile kız karındaşı Ümmühânî nâm hâtuna bi’l-irsi’ş-şer‘î intikāl eyledikden sonra anam dahi fevt olup verâseti ancak bana münhasıra olmağla nısf-ı menzil-i mezbûr irsen bana isâbet ve intikāl etmekle otuz seneden mütecâvizdir ki binâen aleyh ale’l-iştirâki’s-seviy menzil-i mezkûra mâlikâne vaz‘-ı yed eyleyip zabt ve tasarruf ederiz deyicek isre’l-istintâk akībe’l-inkâr mezbûrdan takrîrine mutâbık beyyine taleb olundukda udûl-i ricâlden olup mezbûr Turşucu mahallesi sükkânından olan es-Seyyid Mustafa Çelebi b. es-Seyyid Ahmed ve Mehmed Bey b. Ali ve Mustafa Çelebi b. Nasuh ve Dilâve[r] Bey b. Abdullah nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka menzil-i mahdûd-ı mezkûr merkūm Armağan bölükbaşının mülkü olup ba‘dehû sulbiye kızları İsmihân ve Ümmühânî’ye minvâl-i muharrer üzre irs-i şer‘le intikāl eyledikden sonra merkūme İsmihân dahi fevt olup menzil-i mezkûrdan nısf hisse-i şâyi‘ası sadrî oğlu mezbûr Mehmed’e irsen isâbet ve intikāl eyledi [6] ve târih-i kitâba gelince otuz senedir menzil-i merkūm iştirâk-i seviy vechi üzre mezbûrân Mehmed ve Ümmühânî’nin mülkiyet üzre zabt ve tasarruflarında olup vaz‘[-ı yed] ederler biz bu husûsa bu vech üzre şâhidleriz ve şehâdet dahi ederiz deyû her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle mezbûr Abdülbâkī Efendi mezbûr Mehmed ile bî-vech mu‘ârazadan men‘ birle mâ va[ka‘a] bi’t-taleb ketb olundu. Fi’l-yevm ışrîn [min] Şevvâli’l-mükerrem li sene hamsîn ve semânîn ve elf. Şuhûdü’l-hâl: Derviş Mehmed Efendi b. Mustafa el-İmâm, Ömer Efendi b. Ramazan el-İmâm, İbrahim Halîfe b. Murad, Ahmed b. Abdullah, Ahmed Beşe b. Mehmed, Murad Yazıcı b. Abdurrahman, Ali Çelebi b. Mustafa, Mehmed b. Ahmed, Ali Reis b. Süleyman, Ali Efendi b. Mehmed imâm-ı sâbık ve gayruhüm